BAGHMARA: Garo Hills-o Jal Jeevan Mission (JJM)-ni bang·bata kamrangan chu·sokjaenga ine matnanganirangko matnangengon, da·o South Garo Hills a·jao song donggijagipa aro mande donggijagipa song damgniko JJM project-o napata ine East Garo Hills a·jani social activist Nilbath Marak parakattaiaha.
Iani bidingo Niksamso Garo Community Organisation (NGCO), Marak-na u·iatani ja·man ma·sina man·aha.
Marak-ni parakatani gitade ua an·tangan saksa South Garo Hills a·jani Nongalbibra samba joloniko jik ra·e, ia jolrangni gimin namen ma·sigipa ong·a aro JJM website-o Rongkandi Raksanggre minggipa songko janapaniara namen aiao inmanani ong·aha.
“JJM website-o seani gitade ia Rongkandi Raksenggre songo te 22 nokdangrang aro sak 176-mangni gita songdongenggipa manderang donga indiba kakketode ia song dongan dongchengja,” ine Marak parakataha.
Marak-ni parakatani gitade, JJM website-o Dobakkol Simsanggittim minggipa songkoba janapani donga aro website-o mesokani gitade, ia songo te 38 nokdangrang aro sak 190-mangni gita songdongenggipa manderang dongachim. Indiba ia songo da·o manderang songdonggiparangan dongjahachim ine Marak parakataha.
“Anga an·tangan Nongalbibra-o songdonggipa ong·e, JJM-ni kamrango iandakgipa obostarangko nike namen aiao inmana. Simsanggittim minggipa songde donga indiba 1992 bilsionin ia songo darangba songdonggipa dongjaha. Indide banoniko PHE department, te 38 nokdangrang aro sak 190 manderangni songdongako nikaha?” ine Marak sing·doataha.
JJM website-o parakani gitade, ia Simsanggittim project-ara Dobakkol Chengalgittimni Nongalbibra Augmentation project ning·o ga·akaha aro report-o mesokani gitade, ia songo donggipa te 38 nokdangrangoni te 36 nokdangrangnade Functional Household Tap Connection (FHTC) ba chi pipe-rangko sale on·manahachim.
Raksenggre songni gimin janapatskaengon, ia project-koba Nongalbibra Augmentation project-ni ning·o Rongkandi Dengjema baksa apsan mesokaha ine Marak parakataha.
“JJM website-o mesokani gitade, ia Raksenggre songo donggipa te 22 nokdangrangoni te 20 nokdangrangnade chi pipe-rangko sale on·manaha. Ia songan ia jolrango dongjaora badia nokdangrangnasa chi pipe-rangko sale on·skaaha,” ine Marak sing·doataha.
Ia project minggnian PHE Simsanggre Division-ni ning·o ga·aka aro Nongalbibar Augmentation WSS project-na gong kror 7.2 koros ong·aoni gong kror 5.63-kode oke ra·manaha ine janapatskaengon, ian JJM-ni kamrango tangka jakkalsretaniko mesokani ong·enga aro iani bidingo ua department-ni kosako FIR ka·doanggen ine Marak parakataha.