SHILLONG: West Jaintia Hills a·jani Assam-Meghalaya sima jolo donggipa Lapangap songo, Karbi manderangni re·napbae, rike dongipa nok aro bol chararangko songni manderang, jinma nisie galani ja·man dolgnini gisepo adita so·sojengjeng ong·aniko nikna man·aha indiba ja·mano police dolrang, ta·raken kamko ka·anichi dolgnini gisepo so·sojengjeng ong·aniko namatpilna man·aha.
Ia a·sel ong·ani bidingo kobor ra·timgipa manderangna talate on·angengon, West Jaintia Hills a·jani simarango iandake golmal ong·gipa dambonga biaprangkode sorkari namatna man·aha ine Budbar salo, a·dokni Cabinet Minister aro MDA-na ku·wattimgipa Paul Lyngdoh parakataha.
“Komibeoba song dambongaode dolgnini gisepo meligrikgijanirangko namatna man·aha aro iani bidingo sorkari, re·baenggipa August 15 tariko a·songni jakgitelani salko manianio jinmana parakatgen,” ine Lyngdoh aganenba, August 15 tarikna skangan sorkari, West Jaintia Hills a·ja jolrango golmal ong·enggipa gipin biaprangkoba namatna jotton ka·gen ine ku·rachakaniko on·angaha.
Lapangap song, jekon Meghalaya aro Assam a·dok damgnian a·kangtokengachim, ia songo Karbi manderang, bol charangko ge·ahani gimin aro nokko rikahani gimin Budbar salo, West Jaintia Hills a·jao donggipa Lapangap songni manderang, dingtang dingtang dolrang baksa ia biapona re·ange, bol chararangko aro uamangni rike dongipa nokko pe·e galeaha.
Iandake dolgni so·sojengjeng ong·engmiting somoio manderangko katatna gita Assam police, tear gas-rangko godapaha indiba ia a·sel ong·anio darangba saknaanirangkode man·jaha.
Ia a·selni bidingo janapatengon, manderangna naljokaniko on·na gita Meghalaya a·dokni police-rang, ta·raken ua biapona re·angaha ine Lyngdoh parakataha.
Ia a·selni bidingo Meghalaya sorkari, Assam-ni kosako jegalaniko mesokna nangenga ine janapatengon, adita salrangna skang a·dok damgnini chief minister-rang tom·aniko ong·aton tom·tome matchotna man·aha aro uni ja·man West Jaintia Hills regional committee-ni chairman aro a·dokni Deputy Chief Minister Sniawbhalang Dhar-ba, Assam-ni dilgiparang baksa tom·e chanchirimaha ine Lyngdoh parakataha.