TURA: East Garo Hills a·jani Nengkra A·we songo rikgipa Children Adolescents Library aro Digital Infrastructure-ko niam gita rikjaha ine East Garo Hills a·jani dingtang dingtang dolrang, chong·motan Garo Students’ Union (GSU), Federation of Khasi Jaintia and Garo People (FKGJP), Garoland State Movement Committee (GSMC), A’chik Holistic Awakening Movement (AHAM), A’chik Dedicated Integrity Leaders (ADIL), A’chik Progressive Approach (APA), All A’chik Youth Federation (AAYF) aro jolo songdongenggipa manderang matnangatenba, ia library aro Digital Infrastructure-ko rikani bidingo sandirokatchina East Garo Hills a·jani Deputy Commissioner-ko didiataha.
NGO-rangni seachi parakatani gitade, ia library aro Digital Infrastructure-ko rikna gong 21,62,357.16 tangkarangko chame, 2024 bilsini October 4 tarikon work order-ko on·aha aro ia project-ara Samanda C&RD Block-ni ning·o ong·e, Nengkra, Bolsalgittim, Chima Dachit, Gradekgittim aro uandakgipa songni VEC-rangna dangdike on·ani ong·engachim.
Indake ong·engon, re·anggipa June 25 tariko, East Garo Hills a·jani dingtang dingtang dolrang, ia biapona re·ange, nok rikanirangko niangan baksana jolo songdongenggipa manderang baksaba agangrikeaha.
“Ia library aro digital infrastructure-ko nieon, toilet-ni septic tank-koba tarisogimin design aro gadang gita rikajaha ine chinga nikna man·aha aro ian koros komiatna dakaniko mesokani ong·a. Ia project-na hisapgimin korosode ia noko rainwater harvesting tank-ba dongna nangachim indiba ia mikka chi chimongani tengkiko rikjaha. Ia nokni mongsonggipa bakrangko da·on bretanirangko nikna man·engaha aro ian mikkangchi chadamberangna aro bi·sarangna kenchakna nanganiko mesokenga. Ia nokko rikanio plaster-koba name ka·ja aro matchotaba matchotjaha,” ine NGO-rang parakataha.
Indake ong·engon, ia nok rikaniko ta·raken jakgitelgipa agency-rangchi sandirokatchina, inquiry report-ko jinmana parakchina aro ia nokko name rikna gita ja·kurangko de·china NGO-rang, East Garo Hills a·jani Deputy Commissioner-ko didiataha.
Iani bidingo somoi gita ja·kurangko de·jagenchimode chubata gadangrango aro Lokayukta-o badi ka·doanggen ineba NGO-rang, mikrakataniko on·angaha.
Nengkra-o rikgipa Library-ni bidingo inquiry dakchina NGO-rang dabia
Date:
Share post:
