TURA: Garo Hills-ni adita sorkari skulrangko chalaina Mothers Union baksa soi ka·gipa Memorandum of Understanding (MoU)-o mitam niamrangde skigiparangna aro skulko nirokenggipa managing committee-rangna on·gimin bilrangko re·badeani gita ong·gen ine A·chik Youth Welfare Association, ia MoU-ko name nipiltaienba, niamrangko taridapchina a·dokni Education Minister Rakkam A Sangma-ko didiataha.
Sorkari skulrangko nambate chalaina aro nirok sandina man·na gita Garo Hills-ni dam 20 skulrangko chalaina adita salrangna skangsan a·dokni Education Department, Mothers Union baksa MoU-o soi ka·grikangahachim ine nikna man·a.
Indake ong·engon, ia sorkari skulrangko chalaina soi ka·grikgipa MoU-o on·gimin mitam niamrangde lekka porani kamrango skigiparangna aro managing committee-rangna on·gimin bilrangko re·badeani gita ong·enga ine AYWO parakatenba, ia niamrangko nipiltaichina Education Minister-ko didiataha.
“Ia MoU-ko jasani gisepon den·galpilchina aro gital dake nipiltaichina dabianio All Meghalaya Primary School Teachers Association (AMPSTA)-na chakpaaniko on·enga aro Garo Hills-o lekka porani kamrang nosto ka·ako man·jana gita ia neng·nikaniko ta·raken namatchina dabienga,” ine AYWO, a·dokni Education Minister-na sedoatgipa chittio parakataha.
Adita salrangna skangsan AMPSTA-ni gitaba ia MoU-ni bidingo suk ong·gijaniko parakatenba, ia MoU-ko den·galpilchina sorkario dabiangahachim.
Ia MoU-ni bidingo Mothers Union-ni gitaba ja·mano talataniko on·angskaahachim.