TURA: 2024 bilsi aro una skang Meghalaya Teacher Eligibility Test (MTET) pass ka·e dongenggipa candidate-rangko ta·raken kamo ra·china didie, A·chik Holistic Awakening Movement (AHAM), a·dokni Chief Minister Conrad K Sangma-na sedoataha.
AHAM-ni president George Prince Ch Momin-ni parakatani gitade, MTET pass ka·e dongenggipa candidate-rangko skigiparangni kamo ra·na changni chang ku·rachakaniko on·ahaoba da·alonan 2024 bilsio MTET pass ka·gipa candidate-rangkode kamo ra·ani bidingo maming u·iatanirang dongkuja aro iani a·selan kamna senge dongenggipa skigiparang, neng·nikanirangko chagrongna nangtokengahachim.
“2024 bilsini January 31 tariko u·iataniko on·ani gitade, 2023 bilsini December 1 tariko ong·atgipa MTET 2024 porikkako sak 15,524 candidate-rang seaha aro ianoni sak 1259 candidate-rang pass ka·ahachim. Indake ong·genchimoba, ia candidate-rangko kamo ra·ani bidingo da·alonan maming u·iatanirang dongkuja aro kamo ra·anikoba a·bachengkujaenga. 2020 bilsioni 2023 bilsiona MTET pass ka·gipa chu·gimik candidate-rangko kamo ra·kujaengon, MTET 2025-ni bidingoba re·anggipa January jani 29 tariko u·iattaiaha aro ian MTET-ko pass ka·e dongsoenggipa candidate-rangna jajrengna nangani ong·engaha,” ine AHAM-ni president parakataha.
MTET pass ka·e dongenggipa candidate-rangko kamo ra·ningja ong·ode mitam candidate-rangde kamna bilsirang badegnok ineba ua an·tangni suk ong·gijaniko parakataha.
Indake ong·engon, Garo Hills-ni pilak a·jarangon 2024 bilsiona kingking MTET pass ka·e dongenggipa candidate-rangko batch-ni kri kamo ra·na gita ta·raken u·iatani (advertisement)-ko on·china, 2020 bilsioni 2023 bilsiona MTET pass ka·gimin pilak candidate-rangkon kam ra·e matchotatchina, gitcham batch-ni candidate-rangko kamo chu·gimik ra·kujaskal 2025 bilsini batch-na kamrangko on·kujachina, district wise LP skulrangna sanction ka·gimin kamrangko jinmana u·iatchina aro MTET pass ka·gipa batch ge·antini candidate-rangkon somoi gita kamo ra·na annual recruitment calendar-ko tik ka·an baksana iana long term policy-koba tarichina AHAM didiataha.