SHILLONG: A·dokona niam gri napsrukanirangko champengna Inner Line Permit (ILP), Meghalaya Residents Safety & Security Act (MRSSA) ba jedakgipa niamko ra·gatgenchimoba, a·songni darang mandenan neng·nikanirangko ra·baskana nangjawa ine Sukrobar salo, Bharatiya Janata Party (BJP)-ni dilgipa aro a·dokni Cabinet Minister AL Hek parakataha.
“An·chingo ILP, MRSSA ba je dakgipa niamrangkoba ra·gatna man·aia indiba India a·songo songdongkamgipa manderangna ia niamrang neng·nikanirangko ra·baskana nangja. Ian angni chanchiani ong·a aro darangba iandakgipa niamrangko ra·gatanichi neng·nikanirangko man·na nangja,” ine Hek, kobor ra·timgiparangna aganaha.
A·dokona niam gri napsrukanirangko champengna gita a·dok sorkari, MRSSA-ko ra·gatna kamko ka·enga ineba ua talataniko on·angskaaha.
ILP-ko ra·gatani bidingo janapatskaengon, da·o dipet ILP-ko ra·gatani bidingo ma·mong sorkari, cholrangko niengkua ine Hek aganaha.
A·doko ILP-ko ra·gatna a·dok sorkarini kam ka·anio a·dokni BJP-ba chakpaaniko on·aigen ineba ua aganaha.
ILP-na bate MRSSA cholibatgenma ine sing·anina aganchakaniko on·angskaengon, ua an·tangde ia minggni niamrangoniko basena man·jawa ine Hek parakataha.
“Ia niamrangko ra·gatchenggijade badia nambata an·ching maikai ma·sigen? Uni gimin ia niamrangko a·doko ra·gatahaode badia nambata ukode aganna man·aigen,” ine Hek aganaha.
Meghalaya a·doko ILP-ko ra·gatchina dabie, 2019 bilsion Meghalaya Legislative Assembly, resolution-ko ra·ahachim indiba da·o bilsidok ong·pilahaoba ILP-ko a·doko ra·gatna man·kujaengachim.