SHILLONG: Bilsi 50 batpilahaoba Meghalaya aro Assam a·dokni simarango ong·enggipa golmalrangko namatchipna man·kujaengon, ia golmalrangko namatna gita a·dok damgnini gisepo pangkamgipa cholko ra·gatani somoi ong·engaha ine Sukrobar salo, BJP-ni dilgipa aro a·dokni Cabinet Minister AL Hek aganaha.
Iani bidingo kobor ra·timgipa manderang baksa agangrikengon, a·dok damgnini simarango ong·enggipa golmalrangko namatna Assam aro Meghalaya a·dokni chief minister-rang agangrikenga indiba ia golmalrangko namatna gita a·dok damgnini gisepo maiba cholko ra·gatani somoi ong·engaha ine Hek aganaha.
“Indita bilsirangna a·dok damgnini simarango songdongenggipa manderang neng·nikanirangko chagrongna nangtokengahani gimin ia golmalrangko namatna gita a·dok damgnini sorkarirang, maiba cholkode da·o ra·gatna nangengaha,” ine ua aganaha.
Hek-ni aganani gitade, a·dok damgnini sorkarirang, pangkamgipa cholrangko ra·gatgenchimode, sima jolrango songdongenggipa manderangni neng·nikanirangko namatna man·genchim.
“Uni giminsa a·dok damgnini simarango songdongenggipa dolgni manderangni namgninan pangkamgipa cholko ra·gatchina chinga nangnikenga,” ine ua aganaha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.