SHILLONG: Amlarem-ni MLA aro gitcham Home Minister Lahkmen Rymbui, Sonibar salo Meghalaya Residents Safety and Security Act (MRSSA-ko a·doko songdonggiparangni bil-rengsiko chelchakna namgipa chol ong·a ine agantaiaha.
Kobor ra·timgiparang baksa agangrikmitingo Rymbui, indine aganaha, “Inner Line Permit (ILP)-o ra·gatchina dabie dongkuengmitingo MRSSA-ko ra·gatsoa ong·ode namgen.
“Ia somoio a·doko songdonggiparangko chelchakna MRSSA nambatgipa chol ong·enga. Da·onaba a·dok sorkari, ILP-ni bidingo ma·mongni ra·chakaniko senge dongkuenga.”
Beben MRSSA-ko taridapna nanganirang donga, indiba ia act-ko ra·gata ong·ode gipin a·dokrangoni Meghalaya-ona re·bagiparang, maiba ong·gija dakanirangko dakna ba ka·na authority-na kenani donggen ine Rymbui aganaha.
MRSSA aro ILP ia minggnikon a·doko ra·gatchina sorkariko dabienga. Mejaomangmang Sohra-o Indore-ni tourist re·bagipa Raja Raghuvanshi-ko so·otani ja·man a·doko so·sojengjeng ong·ani gimin changsatai MRSSA aro ILP-ko ra·gatna gital dake dabianirang nakattaiaha. Sohra-o ong·gipa obostara, a·doko songdonggipa manderangni gisiko niamgri gipin biaprangoni re·bae ong·gija kamrangko ka·anina kenchakaniko napataha. Indake bilakgipa regulatory mechanism-ko nangnikenga.
Niatgenchimode Meghalaya Legislative Assembly, meja bilsio Meghalaya-o ILP-ko ra·gatna resolution-ko pass ka·e ma·mong sorkariko mol·molaha. Indiba da·onan ma·mong sorkari iani gimin mamingkon aganchakkujaenga.
