Shillong: East Khasi Hill district-ni ning·o donggipa Nongmensong songni bilsi-31 ong·gipa gimaenggipa me·chikko salbrini ja·man kilometer 1,500 ong·e chel·gipa Uttar Pradesh-ni rel-rama sepangjoloniko man·pilaha. Gimagipa mande indita chel·bea biapona maidake saksan sokangahachim, ian nokdangni manderangna aro police dolrangna aio inmanpilaniba ong·aha.
Janice Angel Mary Sawian-ko July 4 tarik Sukrobar salo, Uttar Pradesh-ni police dolrang man·aha, ua July-ni 1 tarik dipet nokoni gimaahachim. Indake nokoni salbrina gimani ja·man man·pilgipa me·chikko sing·sandianiko dakanio, ua me·chik an·tangni Uttar Pradesh-china maikai sokangahachim da·odipet name agana man·kuja. Gimagipa me·chikni nokdangni manderang re·anggipa July 1 tarik, attam dipet ua nokona sokbapiljani ja·man Nongmensong Police Outpost-o badi ka·aha. Uttar Pradesh-o man·ani ja·man Sawian-ko medical ka·aha.
