SHILLONG: Adita salrangna skang, Sohra police station-o chadambe saksako doka sata dakan baksana kragija dake sasti on·e roa ine matnangani ja·man ia police station-ni sub-inspector (SI) baksana Unarmed Branch (UB) constable sakbrini kamko dontongataha.
Ia a·selni bidingo departmental inquiry-ko dake, Budbar salo report-ko man·ani ja·man, ia sakbonga police-rangko kam dontongataha.
Ia police sakbongani kosako criminal case-koba segataha.
Bilsi 19 ong·gipa Getwin Jyrwa-ko Sohra police station-o doka sata dakan baksana kragija dake sasti on·e roaha aro ian mandena on·gimin bilko pe·ani ong·a ine re·anggipa Sombar salo, ia chadambeni ma·gipa Mildred Jyrwa, East Khasi Hills a·jani SP-na aro MHRC-na badi ka·doangahachim.
Ia me·chikni badi ka·doangani gitade, uni depanteko police-rang sandienga ine koborko man·soahani gimin ua an·tangni depanteko July-ni 3 tariko, Sohra police station-ona salange donahachim. Ua salni attamchibara uko rimna re·angpilon, uni saknaa man·anirangko nike ua jagokmanpilaha ineba Jyrwa janapataha.
Uni ja·man Getwin-ko Sohra Civil Hospital-ona ra·angaha aro ja·mano uko Shillong Civil Hospital-ona nambate sanna bananiko ra·china watatskaaha.
Uni depante maiba ong·gija kamko ka·aha ong·ode police-rang niam gitasa ja·kuko de·na nangachim indiba ia obostao police-rangni kamara dingtangsa ong·aha ineba ua parakataha.
Indake ong·engon, ia a·selni bidingo inquiry-ko dakchina East Khasi Hills a·jani Superintendent of Police (SP) Vivek Syiem, Pynursla-ni SDPO Baialamphang Wanswett-na ge·etaniko on·angaha aro inquiry report-ko man·ani ja·man, Sohra police station-ni SI aro constable sakbriko kamoniko dontongataha.
Ia a·selni bidingo gipin police station-oni inspector-ni gadango sandirokchina gitaba ge·etaniko on·angaha.
 |
|