TURA: West Garo Hills a·jao ma·mong sorkarini scheme-rangko nambate chu·sokatna man·na gita Bristibar salo, Tura-ni MP Saleng A Sangma, District Development Coordination & Monitoring Committee (DISHA)-ni tom·aniko Tura-ni Circuit House-o ong·atangenba, dingtang dingtang department-ni kamrangko nipilangaha.
Ia Tura-ni MP aro DISHA-ni Chairman Saleng A Sangma baksana DISHA-ni membor-rang, West Garo Hills a·jani Deputy Commissioner Vibhor Aggarwal, District Rural Development Agency-ni Project Director Jude Rangku T Sangma aro dingtang dingtang department-ni officer-rangba bak ra·angtokaha.
Ia tom·anio dingtang dingtang department-ni officer-rang, an·tangtangni department ning·o, ra·gate ka·enggipa aro chu·sokatgimin kamrangko Tura-ni MP-na agan-talate on·angtokaha. Chu·sokanirang baksana kamrangko ka·anio chagrongna nangenggipa neng·nikani aro mikkangchi dakna miksonganirangkoba official-rang, Tura-ni MP-na talate on·angaha.
Ia tom·anio ma·mong sorkarini dingtang dingtang scheme-rang, jekai MGNREGA, PMAY-G, NASP, NRLM, RGSA, DDU-GKY, JJM aro uandakgipa scheme-rangni chu·sokgipa ong·ani aro iandakgipa scheme-rangko chu·sokatanio chagrongna nangenggipa neng·nikanirangko Tura-ni MP sing·sandie ra·angenba, ia scheme-rangko manderangni namgnina nambate chu·sokatna gita pilak officer-rangkon ku·cholsan ong·e kamrangko ka·china didiangaha.
Dingtang dingtang department-rangni neng·nikanirangko nangchakegipa ministry-rangna u·iatskana ku·rachakaniko on·angengon, sorkarini scheme-rangko, a·songo songdongenggipa mande sakantionan sokatna gita ia scheme-rangni gimin manderangna u·iataniara scheme-ko jako ra·e ka·enggipa department aro officer-rangni daitoan ong·a ine Tura-ni MP aganaha.
Songni nokni manderangna ringani chirangko sokate on·na ma·mong sorkarini ra·gatgipa Jal Jeevan Mission (JJM)-ni gimin chanchirimangengon, ia kamrangko on·gimin somoirangni gisepon songantiona sokate on·na man·na gita kamrangko nambate nirokchina gita Sangma, official-rangko didiangaha.
A·dokni chadamberang, a·doktangon dingtang dingtang changa sapanirangko skie ra·na man·na gita training centre-rangko namdapatna nangengani giminba ia tom·anio chanchirimangaha.
Photo: West Garo Hills a·jao ma·mong sorkarini scheme-rangko nipilna gita dingtang dingtang department-rang baksa tom·anio Tura-ni MP aro District Development Coordination & Monitoring Committee (DISHA)-ni Chairman Saleng A Sangma, chanchirimaniko dilenga.