WILLIAMNAGAR: Me·chikrangna janggi tangani cholrangko on·na man·na gita Bristibar salo, East Garo Hills a·jani District Sankalp Hub for Empowerment of Women, District Social Welfare Office baksa nangrime, achar tariani bidingo training program-ko Williamnagar-ni DRDA Hall No. II-o ong·atangaha.
Ia training program-ara, songalo me·chikrangna bilko on·na, lekka porako on·na aro janggi tangani cholko on·na gita ma·mong sorkarini ra·gatgipa ‘Beti Bachhao, Beti Padhao’-ni bak ong·a.
Ia training program-ko ong·atanio sak 200-na baten me·chikrang, achar tarianiko skie ra·na cholko man·aha.
Ia training program-ko ong·atanio, Williamnagar Government College-ni ning·o donggipa Food Processing, Baking & Confectionery-ni Instructor Cheno Ch Marak, achar tarianiko skie on·angenba, an·tangtangni skie ra·giminko sakgipinrangnaba skie on·skachina didiani kattarangko aganangaha.
Photo: Training program-ko ong·atanio, Williamnagar Government College-ni ning·o donggipa Food Processing, Baking & Confectionery-ni Instructor Cheno Ch Marak, achar tarianiko skie on·enga.