SHILLONG: Meghalaya a·doko cabinet jujaatna jangbingbangenggipa kattarang gipengon United Democratic Party (UDP) president Metbah Lyngdoh Sukrobar salo iani bidingo rongtalen talataha, cabinet-ko jujaatani bidingo party-ni gisepo ma·sichakani ba ning·ani bako agreement dakarang dongja.
“Indakgipa kattarangna agangrika dongja namnikaba dongja. UDP-ni parakatani gitade, iani bidingo chinga agangrika dongja. Indiba knalni gimin aganna man·ja politics-de politic ong·a. Iana agre agana man·jawaha,” ine Lyngdoh aganaha.
Meghalaya Democratic Alliance (MDA-2) sorkariko rikanio National People’s Party (NPP) baksa UDP mongsonggipa bak ong·e bakrimenga, sak 12 MLA-rangoni sakgni UDP-ni candidate-rang cabinet ong·enga. Party gadangrangni gisepgriko bil suale kam ka·na namnika ba jedakgipa jujaatanina chanchisoanina ku·pattianiko aganna Lyngdoh jechakaha.
Cabinet gadango dingtangna am·enggipana aganna dongode ine sing·doanina “Mamingan dongja, UDP-ni gisepgrikoba agangrika dongja,” ine ua aganchakangaha.
June 24 tariko Chief Minister Conrad Sangma-ni agangipa kattako namnikaha jeon ua aganaha, jensalo sal somoirang aro neng·nikanirang sokbaa cabinet jujaataniko dakna ra·chakgen.
Garo Hills Autonomous District Council (GHADC) election ong·na am·enggipana UDP-ni chanchisoanirangko Lyngdoh aganangaha.
Garo Hills-o joltangni manderang aro ripengrang baksa ja·ku de·na party agangrikaha aro candidate-rangko on·a namnikangaha. Bon·kame chanchianiko dakujaenga, ine ua aganaha.
“Indiba chinga chanchina am·engaha. Chinga chingni Garo Hills-oni ripengrang baksa agangrikaha, chinga candidate-ko donangna nangnikenga indiba iani bidingo chinga name dake chanchikuja,” ine ua aganaha.
