SHILLONG: Manderangni tangkarangko nanggijagipa rika cho·ani kamrangna jakkalanichi indin koros ong·ata ine NPP-ni MDA sorkariko Butbar salo Voice of the People Party (VPP) raken jeataha, dingtangmancha Khybdai Lad-o donggipa gitcham Assembly biap aro Main Secretariat-o taridapani kamrangko ka·enga.
Assembly Secretariat na Secretariat Administration Department (SAD)-mangmangosan ong·aija pilak department-rango nanggija korosrangko ka·enga ine VPP-ni president Ardent Miller Basaiawmoit aganaha.
“Gitalgipa Assembly nok rikenggipa matchotna am·engoba gitcham Secretariat-oba rikanirangko dakuenga. Taridapenggipa nokko bang·gija somoirangoni ja·manon rue galaignok. Indakgipa kamrangko ra·chakna man·ja aro iani bidingo sing·dona nanggipa ong·enga,” ine Basaiawmoit aganaha.
Seoka man·gipa ong·e jensalo manderangni gamjinrangko jalsretengnina ian uni aganchakna nanggipa kam ong·a, ua aganaha.
“Ong·gija kam ka·arangko nikengon chinga jripjrip dongchajawa,” ine ua aganaha.
New Shillong Township-o gital Secretariat-ko rikna sorkari chanchimanahaode Main Secretariat-o taridaptaiani kamrangko ka·ataniara maidakgipa chanchiao pangchake dakenga ine Basaiawmoit sing·doangaha.
“An·chingni kangalgipa a·dok dakgipna indakgipa nanggijagipa koros ka·anirangko nike gisiko ka·tongo duk ong·a, jean grojinang baksa baljrimgipa ong·a aro an·chingni a·dok tangka paisani gita dakchakaniko nanggipa ong·a,” ine ua agandapangaha.
Manderangni tangka paisarangko sorkari maidake koros ka·enga aro jakkalanio ronggrike kam ka·ani dongjani giminsa kenchaksoani ong·enga ine ua aganaha.
