Dosi dakgipako sandie rim·china ma·a-paa dabia
TURA: South Garo Hills a·jaoni gimagipa bilsi 15 ong·gipa me·chikni manggisiko man·aha.
Uamangni demechikgipako drae til·ekenba so·ote galna nanga ine me·chik bi·sani ma·gipa pagipa chanchichipe aaganah, unigimin iani bidingo nambate am·sandianiko dakchina dabiaha.
Bilsi sokkugijagipa me·chik bi·sa meja July 11 tarikonin gimaaha, uni ja·man salgipin July 12 tariko Rongara Police Station-o ma·gipa pagipa missing report-ko on·aha. Dosi dakgipa mandeko name dake am·sandie rim·china ma·gipa pagipa South Garo Hills a·jani Superintendent of Police-na gital dake segate on·taiaha.
‘‘Rasong gribee salbrini ja·man me·chik bi·sani manggisiko man·aha. Manggisiko man·ani ja·mano, police manggisiko postmortem ka·na ra·angaha. Indake gimikko nigope nianio pangchake chinga raken bebe ra·a je, uko drae til·ekaha aro ma·sina man·gijagipa mande uko so·otaha’’ ine uamangni matnange segatanio ma·gipa pagipa janapataha.
Iani mamlao dosi dakgipa mandeko ning·tubate am·sandichina uamang mol·molangaha aro maming ja·manchakatani gri dos dakgipako rim·china aro so·ota man·gipana kakket bichalko on·china dabiangaha.
Superintendent of Police (SP), Shailendra Bamaniya-ni aganani gitade, July 12 tariko missing report-ko man·aha aro ua salonin me·chik bi·sako sandina a·bachengahachim. Ia a·selko POCSO Act-ni ning·o mamlako segataha.
“Missing report-ko man·ani salgnini ja·manon, Jul 14 tariko pring 11 bajmango manggisiko man·aha. Aro rang·sanan Baghmara-ni dolsa Women’s PS team-ko manggisi man·gipa biapona watataha aro dolsa forensic team-koba Shillong-oniko okamatenga. Dugapile mikka waani gimin a·selrangko rim·a man·ani sakki ba chinrang gimaaha ba nosto ong·aha indiba a·bachenge nie-nike ma·sichipilani gitade ia me·chik bi·sako til·ekenba so·ote galna nanga. Indiba post mortem ka·ani ja·mansa chong·mot a·selkode ma·sina man·aignok” ine Bamaniya aganaha.
Da·omitingode darangkoba chanchichipe ma·siatna man·kujaenga.