Songni manderangni mol·molako MLA aro CM chu·sokatkuja
SHILLONG: North Garo Hills district-ni Kharkutta C&RD Block-ni ning·ogipa Na·chirongdik Adhoc Lower Primary school nokko rike on·china gita A·chik State People’s Front (A.S.P.F) Kharkutta Regional, July 18 tariko North Garo Hills Resubelpara-ni District Mission Co-ordinator-ko mol·aha.
ASPF-ni koborna u·iatani gitade, organisation re·anggipa July 17 tariko Na·chirongdik songonan re·angenba School nokni obostarangko nieha aro songni nokni dilgiparang aro manderangko grongenba a·sel obostarangko sing·e-sane ra·aha ine ASPF dilgipa u·iataha.
Uamangni sing·e sane nianio ma·sibaani gitade, mikka-balwa ta·rakmiting somoio School nokni nokkingrangko kikangtokaha, aro da·o nokkingrang dongjani gimin buringrang dikkrippiljok ine nikbaaha. Unigisepom songni nokni manderangni aroba Na·chirongdik songni headman-ni aganani gitade, ia school nokko tarie on·china gita uamang a·joltangni MLA Rupert Momin aro uandake Meghalaya Chief Minister Conrad Sangmakoba mol·molahachim indiba da·alona kingkingba mamingkon dake on·kuja ine songni manderangni agananiko ASPF parakaha.
Indake da·o songtangni community hall-osa school-kon ka·skaenga ineba songni manderang agananiko organisation parakataha.
Ia Na·chirongdik songo nokking 56 mangsan dongaioba school-o poraigipa chatro-chatrirang sak 50 donga. Unigimin school-o poraienggipa chatro-chatrirangni namgnina school building-ko ta·raken tari on·china Education Minister Rakkam Sangma aro gipin daito gnanggipa department-koba ASPF mol·molataha.