TURA: West Garo Hills a·jani Selsella-o donggipa PWD rama namsrangjahani gimin changni chang sorkarina u·iatahaoba maming aganchakani ba ja·ku de·chakatanirang dongjahani gimin Selsella-o dingtang dingtang dolrangni nangrime bikotgipa All Selsella NGOs’ Alliance (ASNA), an·tangtangan ia ramako tarina tik ka·angaha.
Iani bidingo West Garo Hills a·jani Deputy Commissioner-na seachi u·iatengon, Selsella PWD ramani obosta namsrangjahani a·sel manderang re·ruraanirango neng·nikanirangko chagrongna nangtokengani gimin ia ramako uamang an·tangtangan tarina tik ka·aha ine ASNA-ni dilgiparang parakataha.
“Ia rama namsrangjahani a·sel Selsella jolo songdongenggipa manderang bang·a neng·nikanirangko chagrongna nangtokenga aro janggi tanganioba neng·nikanirangko man·na nangenga. Ia ramako tarie on·china chinga changni chang Meghalaya sorkarina u·iatahaoba aro re·anggipa bilsio jinma re·jome dabianirangko dakahaoba maming aganchakaniko aro ja·ku de·chakaniko nikna man·jahani gimin chinga an·tangtangan ia ramako tarina tik ka·aha,” ine ASNA parakataha.
Ia ramako tarianio NGO-rang baksa Selsella jolo songdongenggipa manderangba bak ra·gen aro uamang an·tangtangni korosrangchin ia ramako tarigen ineba ASNA-ni dilgiparang parakataha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO, ANYO, GSMC aro ACHIK dolrang bakrimengachim ine nikna man·a.
