TURA: South Garo Hills a·jani Chokpot jolrang, biap dal·ani a·sel sakbri sakbonga lineman-rangde chu·gimik biaprangko nirokna man·jaenga ine Chokpot jolni nangrimgimin NGO-rang parakatenba, Chokpot jolrango nambate bijoliko nirokna man·na gita lineman-rangko on·dapchina aro contractual lineman-rangko kamo regularize ka·e on·china a·dokni Power Minister AT Mondal-ko didiataha.
Iani bidingo Chokpot jolni nangrimgimin dolrang, Mongolbar salo, a·dokni Power Minister-ko grongenba memorandum-ko on·angjolaha.
“Chokpot jolrang biap namen dal·a aro bijolirang siani somoirangode da·o kam ka·enggipa sakbri sakbonga lineman-rangde kamrangko ka·sokjaenga. Uni gimin ia jolrango bijoliko nambate nirokna man·na gita lineman-rangko on·dapchina aro contractual-o kam ka·enggipa lineman-rangko regularize ka·china chinga mol·molenga,” ine Chokpot jolni NGO-rang, Power Minister-na sedoatgipa chittio janapataha.
Chokpot jolrango bijoli man·kugijagipa songrang dam 32-na baten donga ine janapatskaengon, Deku, Ganchikalak jolrangba Chokpot-oni sepanggenchimoba Dalu Sub-Station-onikosa jakkalengani gimin neng·nikanirangko man·na nangenga ine NGO-rang parakatenba, Deku joloba power station damsako kulichina, Power Minister-ko didiataha.
Una agreba, Chokpot MePDCL-o kam ka·enggiparangna quarter-rangko rike on·china gitaba NGO-rang, a·dokni Power Minister-ko mol·molangaha.