GHADC Session: Kam ka·giparangna dormaha on·ani bidingo chanchirimjani gimin Opp MDC-rang ong·katgrima

TURA: Budbar salo, Garo Hills Autonomous District Council-ni Monsoon Session-ko ong·atanio, district council-o kam ka·enggiparangna ja 42-ni dormaharangko on·ani bidingo chanchirimna jechakahani gimin Opposition MDC-rang, jinma ong·katgrime kataha.
GHADC session-oni ong·katgrime katgipa Opposition MDC-rangara, Trinamool Congress (TMC)-ni Cherak W Momin, Pardinand D Shira, Alphonsus Marak, Rinaldo Sangma, Agassi Marak aro Bharatiya Janata Party (BJP)-ni Bernard N Marak ong·a.
GHADC session-oni ong·katani ja·man ia Opposition MDC-rang, William Point-ona re·ange, Non Gazetted Employees Association (NGEA)-ni jingjengatanio bak ra·eskaaha.
“GHADC-o kam ka·giparangna dormaharangko on·na man·jaengani a·sel neng·nikanirangko chagrongna nangengoba chanchirimna jechakahani gimin chinga session-o dongpana nangnikjaha. Ian GHADC-o nangchongmotenggipa chanchirimani ong·achim aro iani giminsa chinga session-o chanchirimna ra·baahachim. Indake ong·genchimoba, chingni ra·bagipa motion-ko deputy chairman ra·chakjahani gimin chinga session-oni ong·katna draatako man·aha,” ine Tura-ni BJP MDC Bernard N Marak parakataha.
Batanggimin bilsi gittamni gisepo, grorangko matchotatna gita GHADC-o chu·onga gitan kajinarangko man·ahachim ine janapatengon, iako ua District Council Affairs department-o RTI ka·e ma·sina man·aha ine Marak parakataha.
Marak-ni aganani gitade, ma·mong sorkarioni on·atgipa tangka paisarangko man·chape dingtang dingtang cholrangoniko GHADC, gong kror 131-na baten tangka paisarangko man·soahachim.
“GHADC-o an·tangni man·enggipa kajinarangan donga aro ia kajinarangchi kam ka·giparangni dormaharangko on·na man·achim. Indita tangka paisarangko man·soahaoba, tangka paisarangko name jakkaljaha aro dormaharangkoba on·chipjahani a·sel da·o kam ka·giparangna dormaha on·na nangani ja 42 batpilengaha. Dormaharangko bilsiprak dake on·genchimoba, iandake grorang dongjawachim. Iani giminsa chinga da·alni session-o chanchirimna ra·baahachim indiba rasong gribee chingni nangnikaniko Deputy Chairman ra·chakjaha,” ine Tura MDC aganaha.
GHADC-o kam ka·enggiparangni u·iatani gitade, 2023 bilsio uamangna jadokni dormahakosan on·aiaha aro 2024 bilsioba jabongani dormaharangkosan on·aiaha indiba ia bilside jasani dormahakosan on·engkua.
Dingtang dingtang cholrangoniko GHADC, bang·en kajinarangko man·engoba kam ka·giparangni man·na nangenggipa dormaharangde batasa batroroangenga ineba Tura-ni MDC, suk ong·gijaniko parakataha.
GHADC-o kam ka·enggiparangna dormaharangko on·na man·jaengon, mitam ruling MDC-rangde gari gitalrangko aro tangka paisarangko mesoke roskaengani giminba Marak, suk ong·gijaniko parakataha.