TURA: Garo Hills Autonomous District Council (GHADC)-ni gitcham MDC-rang, Ex-MDCs Welfare Association-ni bimingo, an·tangtangni man·na nangkuenggipa pension-rangko ta·rake on·china gita a·dok sorkari, District Council Affairs department aro GHADC-o dabiangaha.
Association-ni u·iatani gitade, re·anggipa July-ni 19 tariko, GHADC-ni gitcham MDC-rang, Tura-ni SMELC building-o tom·aniko ong·atangenba, gitcham MDC-rangni man·na nangkuenggipa tangka paisarangni bidingo chanchirimangaha.
GHADC-ni gitcham MDC-rang, 2013 bilsini April 1 tarikonin, an·tangtangni man·na nangkuenggipa pension-rangko man·chipkujaenga ine janapatengon, iani bidingo uamang gitcham Executive Committee-rang aro da·o ong·enggipa EC baksana a·dokni Chief Minister Conrad K Sangma-naba u·iatahachim indiba da·alonan an·tangtangni man·gnirangko man·tokkujaenga ine association parakataha.
“2025 bilsini March jao chinga Chief Minister-ko gronge, chingni man·na nangkuenggipa pension-rangni bidingo agangrikon, gitcham MDC-rangni pension-ko gamna gong kror 5 tangkarangko man·chape gimik kror 10 tangkarangko GHADC-na chamataha ine chingna aganataha indiba gitcham MDC-rangni pension-rangko gamna gita a·dok sorkarioniko tangka paisarangko man·soa dongkuja ine June 26 tariko, GHADC-ni Secretary-na chingna seachi u·iatskaaha,” ine Ex-MDCs Welfare Association-ni president WD Marak talataniko on·atenba, gitcham MDC-rangni pension-rangko gamchipgija donaniara High Court-ni rai on·aniko pe·ani gita ong·enga ine parakataha.
Gitcham MDC-rangni man·na nangkuenggipa pension-rangko ta·raken on·china gitaba Ex-MDCs Welfare Association, a·dok sorkari, District Council Affairs department aro GHADC-ko didiataha.