TURA: West Garo Hills a·jani New Bhaitbari jolrango poraienggipa chatro chatrirang, biaptangon donge porikkarangko sepana man·na gita Bhaitbari Higher Secondary School-o Secondary School Leaving Certificate (SSLC) examination centre-ko kulie on·china All Meghalaya Minority Students Union (AMMSU), Meghalaya Board of School Education (MBOSE)-ni Executive Chairman-ko didiataha.
AMMSU-ni parakatani gitade, da·o dipet New Bhaitbari jolrango donggipa dingtang dingtang songni chatro chatrirang, Chokchokia SSLC examination centre-onasa re·rurae SSLC porikkako sena nangtokenga aro ian chatro chatrirangna re·a doani korosko ong·atan baksana chatrirangnade kenchakna nanganikoba ong·atenga.
“Chokchokia SSLC centre-ona re·rurae porikkako seanio chatro chatrirang, dingtang dingtang neng·nikanirangko chagrongna nangtokenga aro iandakgipa neng·nikanirangko man·engani a·selan porikkako seanio gisikni gita bringbrangatako man·tokenga,” ine AMMSU parakatenba, Bhaitbari Higher Secondary School-o SSLC examination centre-ko kuligenchimode, iandakgipa neng·nikanirangko chatro chatrirang chagrongna nangjawa aro an·tangtangni porikkarangko nambate sena cholrangko man·pagen ine talataniko on·angaha.
Bhaitbari HS School-o SSLC centre-ko kulianichi ia jolrango lekka porako tang·doatna cholko man·gen ine janapatskaengon, ia skulo SSLC centre-ko kulina gita ta·raken kamrangko ka·chakatchina AMMSU, MBOSE-ni Executive Chairman-ko didiataha.