TURA: Garo National Council (GNC)-ni re·anggipa Butbar salo skanggipa tom·aniko, East Garo Hills, Williamnagar-o donggipa Multipurpose Auditorium-o ong·atangaha.
Indake ia tom·anio, GNC-ni President Kalpana D. Sangma, Vice President Henising A. Sangma GHADC-ni Deputy CEM Nikman Ch. Marak, GHMC-ni Acting Chairman Balkarin Ch. Marak aro gipin mongsonggipa dilgiparangna agreba, Nokma sordar aro songsalo mongsonggipa ong·e dilenggiparang aro songsalni manderangba bakko ra·angtokaha.
Indake mikkang bilsio ong·atnasienggipa GHADC election-ni bidingo jinma chanchirimaniko dakaha aro mikkang bilsini Council election-o Willilamnagar aro Rongjeng Constituency-oni susaatna gita sakgni candidate-rangkoba mingjolaha.
Uomitingo, GNC party-ni ong·bachengani aro battanggimin bilsirango dolni chu·sokatgipa kamrangni bidingo GHADC-ni Deputy CEM Nikman Ch. Marak jinmana agan-parakataha. Meghalaya a·dokni jakgitelna dakgrikdilchenggipa pagitchamrang bang·batan GNC-ni dilgiparangan ong·achim, jekon a·bachengode Garo National Conference ine donenba organization-ni bimango re·dilahachim, indake ja·mano Garo National Council (GNC) ine mingjite chu·gimik political party-ko segataha aro ian skanggipa A·chik jatni political dolba ong·ahachim ine Maraka aganaha.
Ia political dolko, Mody Marak, Emonsing M. Sangma, Jobang D. Marak, Captain Williamson A. Sangma aro Clifford R. Marak mang mongsonggipa ong·e re·dilangaha. Indake uamangni rakbe·e kamrangko ka·anichi da·alo A·chik jatni dakbewalrangko name ripingna aro ja·rikna man·enga ine Marak jinmana talataha.
Bon·kamao, Garo National Council (GNC)-ko mikkangchi maikae Garo Hills gimiko tangchaatpilna aro bilakbatatna man·gen, re·mikkanganio ku·cholsan ong·e kamrangko ka·na inenba tom·anioba re·bagipa sakantian jak songtokaha.
