SHILLONG: Assam a·doko niam gri songdongenggipa manderangko Assam sorkari a·rikgalengon, a·rikgala man·gipa nokdangrangni bi·sarangna Mission Rehabilitation Education-ni bimingo dakchakna aro lekka porako on·na gita University of Science & Technology Meghalaya (USTM) Vice Chancellor-ni parakataniko Meghalaya Pradesh Mahila Congress (MPMC) raken jegalataha.
“Mandeskana ka·sae dakchakaniko chinga jegalenga ong·ja indiba skanggipa Meghalaya a·doko songdongenggipa Khasi aro gipin Tribal jatrango cholgri ong·gipa manderangnan dakchakanirangko on·chengna nanga,” ine MPMC-ni president Joplyn Scott Shylla parakataha.
USTM-ara Meghalaya a·dok ning·on ong·e a·doknikon dingtang dingtang man·gnirangkoba man·engani gimin gipinrangna dakchakanirangko on·na skangde a·doktangni bi·sarangnan dakchakanirangko on·nasa chanchina nanga ineba MPMC-ni president parakataha.
Meghalaya a·dokni Tribal manderang, mongsongbate chadamberang, namgipa lekka porako ra·anio, tangka paisani gita dakchakaniko man·anio aro dingtang dingtang janggi tangani cholrangko ra·anio neng·nikanirangko chagrongna nangtokenga ine janapatengon, “Assam-o a·rikgala man·gipa nokdangni bi·sarangna dakchakanirangko on·na tik ka·aniko USTM-ni Vice Chancellor ra·pilchina chinga didienga aro a·doktangni cholgri ong·gipa manderangna, mongsongbate chadamberangni namgnina kamrangko ka·china chinga nangnikenga,” ine MPMC-ni president parakataha.
Meghalaya a·doko songdongenggipa Tribal manderangni namgnina USTM VC-ni manchienggipa kamni bidingo niatchina gita ua a·dok sorkari aro dingtang dingtang dolrangkoba didiataha.