SHILLONG: Shillong songjinmani Khyndailad ramao ma·manti bosturangko pale cha·enggipa manderangko dingtang biapona apjitna kam ka·anio a·dok sorkari, ia biapo badinge cha·enggipa manderangoni sak 282-nade MUDA Parking Lot-o rike on·gipa dokkanrangko sualatna man·aha.
Ia sak 282 manderangna MUDA Parking Lot-o rikgipa dokkan ba stall-rangko sualatna man·ahani gimin an·tangni kusi ong·aniko parakatengon, Khyndailad ramao ma·manti bosturangko pale cha·enggipa sak 1400-mangni gita manderangko sorkari, name nichengenba niam gita badingna man·gipa manderangna Certificate of Vending (CoV)-rangko on·aha ine a·dokni Tourism Minister aro MDA-na ku·wattimgipa Paul Lyngdoh parakataha.
“Khyndailad-ara Shillong songjinmao mongsonggipa biaprangoni damsa ong·ani aro ia biapona salantian hajalni hajal manderang re·baengani gimin sorkari, ia biapna gisik on·bataha,” ine Lyngdoh aganaha.
Lyngdoh-ni aganani gitade, dongimin niamrango pangchake sak 407 badinggiparang, CoV-rangko man·ani ong·a aro ianoni sak 311 manderangde an·tangtangni CoV-rangko ra·angmanaha.
CoV-ko man·gipa manderangko apjitna gita ge 365 stall-rangko rikaha aro ianoni sak 282 manderangnade, lottery-ko kal·atanichi stall-rangko sualatna man·aha ineba Tourism Minister parakataha.
“Bangki stall-rangkoba niamko ja·rike aro darangnaba mikkang niteani grian CoV donggipa manderangna sualatgen,” ine ua aganaha.
Ia ja·kuko de·aniara manderangna altuaniko aro badinge cha·enggiparangna janggi tangani cholko on·anian ong·enga ine janapatengon, ia kamo bakrimaniko on·ahani gimin Lyngdoh, Roadside Hawkers Association-koba mittelpilangaha.
Khyndailad ramao ma·manti bosturangko pale cha·enggiparangko dingtang biapona apjitatanio dakchakaniko on·na gita sorkari, CoV man·gimin badinggipa sakpraknan changsano gong 10,000 ka·e aro jabongana kingking japrako gong 2000/- ka·e tangka paisako on·enga.
Da·o dipet mitam stall-rangko ra·kujaengoba CoV-rangko ra·pilani bidingo maming badi ka·anirang dongkujaenga. CoV man·gipa pilaknan niamo pangchake dokkanrangko tikate on·gen ineba official-rang ku·rachakaniko on·angaha.
Badinggiparangko apjitanio da·o jabongana kingking Shillong Municipal Board-ko nirokchina gita sorkari ge·etangaha.