SHILLONG: Meghalaya a·doko police-ni dingtang dingtang kamrangna seatgipa porikkani result-rangko bakan parakgnok ine Sukrobar salo, a·dokni Deputy Chief Minister aro Home (Police) Minister Prestone Tynsong parakataha.
Iani bidingo kobor ra·timgiparangna talataniko on·angengon, police-ni kamna porikkarangko seatani da·o matchotmanaha aro result-rangko parakna da·o tariengaha ine Tynsong aganaha.
Police-ni kamna porikkarangko segipa candidate-rang, sak 36,000 aro sak 37,000-ni gisepo ong·naba gnang ineba Tynsong parakataha.
“Je kamrangna porikkarangko seatahachim, ia porikkarangni result-rangko chinga ta·raken parakna ka·dongenga,” ine ua aganaha.
Porikkako seanio ong·gija dakanirang bang·en donga ine matnanganirangna aganchakaniko on·angengon, iani bidingo a·dokni Director General of Police (DGP) sandirokanirangko dakaha aro a·dokni pilak centre-rangon ong·gija dakani sakkirangko man·jaha ine a·dokni Deputy Chief Minister parakataha.
“Oe a·bachengode angni table-onaba badi ka·anirang sokbaaha aro iani bidingo kakketko sandichina anga DGP-ko ge·etaha. A·dokni dingtang dingtang porikka sechakgipa centre-rangoniko sandirokon, ong·gija dakani maming sakkirangko man·jaha,” ine Tynsong aganaha.