AMPATI: South West Garo Hills a·jani Takuranbari aro Ishakuri songrango, niam gri napsrukbae songdong a·chaanirang batroroenga ine A·chik Holistic Awakening Movement (AHAM) South Western Zone, SWGH a·jani Deputy Commissioner aro Superintendent of Police (SP)-na seachi badi ka·doangaha.
AHAM-ni badi ka·doangani gitade, gipin biaprangoni re·baenggipa manderang, tol·e tarigipa lekkarang aro ration card-rangko mesoke voter identity card-rangko tarienga aro voter ID card-rangko man·ahaode, ia songrango songdongkamna man·e, ia songrango a·arangkoba brena a·bachengtokengaha.
“Iandake niam gri napsrukbae songdong a·chatokengani a·sel bilsi bongaprakon rang·san manderangni jelbra jelsuanio tang·dopretaniko nikna man·enga,” ine AHAM SWZ-ni president Wester G Sangma parakataha.
Jolo songdongenggipa manderangni dakchake on·anichin gipin biaprangoni re·baenggipa gipin jatrang, ia songrango songdong a·chana man·enga ineba AHAM matnangataha.
Iani bidingo changni chang badi ka·ani ja·man 2023 bilsini February 21 tariko joint inspection-ko dakana agrede uni ja·man maming ja·ku de·anirang dongtaijaha ineba AHAM SWZ parakataha.
AHAM-ni parakatani gitade, ia songrangara Meghalaya a·dok ning·o ga·akgipa biaprangsa ong·genchimoba ia jolrango Assam sorkari, Jal Jeevan Mission (JJM) aro PMAY scheme-rangko ra·gate on·enga aro iani giminba uamang sorkarina badi ka·doangaha.
“Uni gimin ia jolrango songdongenggipa nokdang ge·antionan re·e, voter ID card-rangko nipilchina aro batanggimin bilsi 10-ni gisepo uamangni on·gipa lekkarangko nipilchina chinga dabienga,” ine AHAM SWZ-ni president parakataha.
Assam a·dokni simao donggipa Mirjumla gita dakait dakani, drugs badingsrukani aro niam gri napsrukanirang ong·batenga ine janapatengon, Assam a·doko niam gri songdong a·chaenggipa manderangko da·o Assam sorkari a·rikgalengahani gimin a·rikgalako man·gipa manderang, Takuranbari aro Ishakuri songrango katnapskana jotton ka·naba gnang ine AHAM mikrakataniko on·angaha.
