TURA: West Garo Hills a·jani Gomaijhora jolrango skangonin niam gri ro·ong quarry-rangko chalaiengon, da·o Chibinang jolrangoba bang·en ro·ong quarry-rangko chalaina a·bachengengaha ine jolo songdongenggipa manderang u·iataha.
Jolo songdongenggipa manderangni u·iatani gitade, Chibinang jolrango niam gri chalaienggipa ro·ong quarry-rang komibeoba dam 20-mang donga aro ia ro·ong quarry-rango bomarangkoba jakkale ro·ongrangko bikotengani gimin ian samtangtango ong·telaigiparangnasan ong·aigija jolo songdongenggipa manderangnaba nangchakeaniko ra·baenga.
Ia jolrango niam gri ro·ong quarry-rangko chalaiengani a·selan niamo pangchake ro·ong quarry-rangko chalaienggiparangde noksan ong·atako man·skana nangenga ineba kobor on·aha.
“Ia niam gri chalaienggipa quarry-rangon dam nom·bate ro·ongrangko man·engani gimin maikai chinga chingni ro·ongrangko pale cha·na man·gen? Chinga an·tangtangde niamo pangchakesa quarry-rangko chalaipaenga indiba mitam manderang, an·tangtangni man·gnina rike, quarry-rangko niam gri chalaiskaenga,” ine Chibinang jolo niam gita quarry-ko chalaienggipa manderangoni saksa aganaha.
Iandakgipa quarry-rangko kulina dingtang dingtang kamrangko ka·na nangani gimin somoirangko bang·en nanga indiba mitam manderang, niamrangko ja·rikgija skatang quarry-rangko chalaiskaenga ineba quarry nokgiparang aganaha.
Iana skang Gomaijhora jolrangoba dam 50-mangni gita ro·ong quarry-rangko niam gri chalaiengachim aro ia jolrango niam gri chalaienggipa quarry-rangko champengna State Forest aro GHADC official-rang donggenchimoba, ro·ong jetani karkana dambrikoba ia jolrango chalaiengachim ine kobor on·timgiparang parakataha.
Ja·mano State Forest department-ni dal·kalgipa official-rang ja·ku de·chakatani ja·mansa, ia jolrango niam gri chalaienggipa karkanarangko chipattokaha ine kobor on·timgiparang u·iataha.
Da·o Chibinang jolrangoba dam 20-mangni gita niam gri ro·ong quarry-rangko chalaina a·bachengtaiahani gimin ia jolrango niam gri kuligipa quarry-rang batroroangkunaba gnang ine kobor on·timgiparang aganaha.
Kobor on·timgiparangni u·iatani gitade, Chibinang jolrango niam gri chalaienggipa quarry-rangara, Dodanggre, Chisekgre, Bamundanga, Rongkhongre songrango ong·a aro Phulbari Irrigation office sambaoba damsa donga.