TURA: Tura songjinmao, mongsongbate Tura Bazar-ni wilwilao donggipa dingtang dingtang gittimrango songdongenggipa manderangni nangani aro neng·nikanirangko ma·sie ra·na gita Mongolbar salo, a·dokni Chief Minister Conrad K Sangma-ni dilanichi Tura Bazar Public Meeting-ko Tura-ni Parade Ground-o ong·atangaha aro ia tom·anio, West Garo Hills a·jani Deputy Commissioner Vibhor Aggarwal, Superintendent of Police Abraham T Sangma, Tura Municipal Board-ni Chief Executive Officer Jude Rangku T Sangma, Tura Bazar-o bading chiwale cha·enggipa manderang aro dingtang dingtang dolni manderangba dongpae bak ra·angtokaha.
Ia tom·anio a·dokni Chief Minister, jinmana aganprakengon, Tura songjinmao songdongenggipa manderang, dingtang dingtang neng·nikanirangko chagrongna nanga indiba manderang baksa agangrikna cholrangko man·rongjani gimin manderangni neng·nikanirangko knatime ra·na ia program-ko ong·ataha ine parakataha.
Tura songjinmako namroro silroroatna gita sorkari, dingtang dingtang scheme aro program-rangko a·bachengataha ine janapatengon, Tourism-ko tang·doatani bak gita Pelga Dare-o hospitality complex-ko rikna gong kror 15 tangkarangko chame on·manaha aro convention centre-ko rikna gitaba gong kror 51 tangkarangko chame on·manaha ine Chief Minister parakatenba, ia kamrangko re·baenggipa 2026 bilsiode matchotgnok ine talataniko on·angaha.
Chadamberangna kal·chakram biaprangko namdapatani gimin aganangskaengon, re·baenggipa 2027 bilsio National Games-ko a·doko sokachakengani gimin Pa Togan Nengminja Athlete
Ia tom·anio Tura Bazar Area Development Committee-ni gita Tura Bazar jolrango chagrongna nangenggipa neng·nikanirangko janape on·angengon, ia jolrango china neng·nikanirangko man·na nangenga ine committee-ni dilgiparang, Chief Minister-na u·iataha.
Ia tom·anio Dobasipara Higher Secondary School-ni principal-ba jinmana aganprakengon, uamangna Chief Minister’s Development Fund (CMSDF)-ni ning·o skul nokko rikna chamatgipa tangka paisarangchi skul nokko rikmanaha indiba skulo poraienggipa chatro chatrirang bang·ani gimin classroom-rangko nangdapkuenga ine tangka paisarangko chamdape on·china Chief Minister-ko mol·molangaha.
Bon·kamao CM Connect program-ko ong·atenba, manderangni chagrongna nangenggipa neng·nikanirangko Chief Minister knatime ra·angaha aro uamangni nanganirangna agan-talatanirangkoba on·angjolaha.