Gital dilgiparang baksa Congress bilakbapiltaigen: Antony
SHILLONG: Budbar salo, Congress dolni saksakamkam MLA Ronnie V Lyngdoh, Congress doloni ong·katenba National People’s Party (NPP)-o napangskaaha.
Congress dolni saksakamkam dongkuenggipa MLA-ba da·o ong·katahani gimin Meghalaya Legislative Assembly-o Congress MLA saksaba dongjaha.
Congress-oni ong·katani chittiko Budbar pringo Ronnie V Lyngdoh, Meghalaya Legislative Assembly-ni Speaker Thomas A Sangma-na on·eaha aro uni chittiko on·eanio, NPP-ni dilgipa aro a·dokni Deputy Chief Minister Sniawbhalang Dhar baksana Mylliem-ni gitcham MLA Hamletson Dohling aro NPP-ni gipin dilgiparangba dongpaaha.
Congress party-oni ong·katani chittiko Assembly Speaker-na on·eani ja·man kobor ra·timgipa manderang baksa agangrikengon, uko Mylliem constituency-ni manderang, sorkari baksa bakrimchina nangnikahani giminsa ua Congress doloni ong·kate NPP-o napna draatako man·aha ine Lyngdoh parakataha.
Mylliem-ni gitcham MLA Hamletson Dohling aro ua sakgnian da·o NPP-o ong·ahani gimin mikkangchi election-rango maiko dakna miksongenga ine sing·on, “Angko constituency-ni manderangsa seokaha aro Hamletson-ba gitcham MLA ong·a. Chinga sakgnian constituency-na dangdike on·angkuna kang·kare kaenga,” ine Lyngdoh aganaha.
Indake ong·engon, da·o dipet Lyngdoh-ni ong·katani chittiko Congress dolde man·soa dongkuja ine Budbar salo, All India Congress Committee (AICC)-ni Joint Secretary Meghalaya In-charge Mathew Antony parakatskaaha.
Lyngdoh-ni ong·katanina uamang maming jagokmanani dongja maina NPP-ni dilgiparang, an·tangtangni ‘cha·enggipa’ tangka paisarangchi gipin party-ni dilgiparangko breenga ineba Antony aganaha.
“Jisu-ko sninggipa sak 12 manderangoni maikai Judas, Jisuko pale cha·ahachim an·ching sakantian ma·sia. Chingni sak 3 aro ia saksa MLA-ba uamangoni maming dingtangja,” ine Antony, iana skang NPP-o napanggipa MLA sakgittam baksana Lyngdoh-ko man·chape aganaha.
“Ia MLA-rangna skangba chengonin Congress party dongachim aro re·baenggipa somoirango party-o rimnapa man·gipa gital dilgiparang baksa chinga bilakbatna man·aigen,” ine AICC-ni joint secretary aganaha.
Congress dolni ku·rachakanian ia tangka ‘cha·rakgipa’ sorkariko bon·atenba, Meghalaya a·dokni manderangko jokatani ong·enga ineba ua aganaha.