SHILLONG: Chattisgarh-o Kerala-oni sakgni nun ba sister-rangko rim·ani gimin a·dokni gimik bakrangon so·sojengjeng ong·engon Sonibar salo Chhattisgarh-ni Bilaspur district-ni special court, sakgni sister-rangko aro saksa mamlao dongchapgipako jamin wataha.
Prosecution, sakgittamkon sing·sandiangna custody-o donangkuna sing·jaha aro uamangko noktangtangona watatpilchina ge·etaha.
“An·chingni Chief Minister Conrad K Sangma, ia mamlako Chhattisgarh-ni CM baksa agangrikataha unbaksana ma·mongni Home Minister Amit Shah-ko grongaha ine Cabinet Minister aro NPP dilgipa Rakkam A Sangma aganaha.
Ong·a obostani gimin parakatengon, Rakkam indine agankuaha, “Iandakgipa obosa ong·arangko ra·chakna man·jawa, India a·songo bringipa jatrang donga, freedom of religion-ko bon·atna nangja. An·ching pilak manderangkon jat basee nigrikna nangja songsalo apsan janggi tanggiparangsa ong·a ine nina nanga, an·ching pilakon India-ni manderang ong·a.
Kerala-ni sakgni nun-rangko rim·ani gimin suk ong·jae Meghalaya Chief Minister aro NPP-ni national president Conrad K Sangma, Chhattisgarh-ni Chief Minister Vishnu Do Sai-na chittiko seate, sakgni Catholic nun-rangni kosako mamla segatanirangko ra·galpilchina mol·molataha. Meja July 26 tariko Durg Railway Station-o Kerala-ni sakgni nun-rangko rim·aha.
Sangma, uni seatgipa chittiko freedom of religion-ni niamko pe·ani gimin ta·raken duko ga·akgipa nun-rangna chelchakaniko on·china aro kakket bichal ka·e on·china aganataha.
Sister Vandana Francis aro Sister Preethy Mary- jemangan Agra Fatima Hospital-o dangdike on·giparang ong·a. Uamang Chhattisgarh-oni Agra-ona songremitingo Chhattisgarh-ni sakgittam me·chikrang baksa songreahim, unomitingo uamangko Travelling Ticket Examiner (TTE) champengrikaha.
Sakgittam me·chikrang baksa songreani ticket dongjachim aro uamang rel gario songregipa sakgni nun-rang baksa songrechapenga ine aganaha. Uni gimin TTE, jolni activist-rangna kobor on·aha. Aro jolni activist-rang sakgni nun-rangko drae sakgittam me·chikrangko torom bodolatenga ine potchipe rim·aha.
Chhattisgarh police-ni sakgni nunrangko rim·aniko Sangma raken jegalataha aro pressure group-rangkoba name dake sing·sandichenge kam ka·china aganaha.
