SHILLONG: GHADC-o kam ka·giparang ja 42-na dormaharangko man·jaenga, da·o uamangni tangka paisana neng·nikaniko man·engon Meghalaya sorkari ADCs-ko bailing-o on·a man·ja.
District Council Affairs-na in charge on·gipa Deputy Chief Minister Prestone Tynsong, GHADC-o kam ka·giparangni matnangatanina aganchakangaha, ADCs gimikkon uamang an·tangtangon name dake rakkina nanggipa aro man·gniko ong·katatna nanggipa ong·achim aro uamangni biap dongani krio pangchake uamang kamo rakkiangna nangachim, ine aganangaha.
“Ian ia bilsimangmangosan ong·a ong·ja indiba ian skang batanggimin bilsirangonin ong·baenga indakgipa mamlarang KHADC wate ADCs-o kam ka·giparang basakobade uamangni dormaharangko man·gi dongan bang·aha,” ine ua aganaha.
Uamangni nanggija koros ka·anirangko komiatchina ADCs gimikna Tynsong ku·pattianiko on·angaha.
“Tangka ritchasakosan kamaia ong·ode aro tangka ritchagniko na·a koros ka·a ong·ode indakode mai ong·gen,” ine ua aganaha.
Indita jarangna uamang tangka man·gijagipa ong·e kam ka·giparang dal·begipa sinjetani ning·o ong·enganiko ma·sichake aganangaha, ia neng·nikenggipako namatchina aro ma·sichake kam ka·angchina ADCs-ni u·ianio sorkari pakwate on·angaha.
Sorkari somoi donga aro changsatai tangka on·soanichi ADCs-ko dakchakna man·gen ine gisik ra·ataiaha, ia chango ADCs-na changsatai on·taia ong·ode sorkari nigen ine Tynsong aganaha.
GHADC-o tangka paisa chu·onggijani fund-rangko ong·gija dake jakkalsretani a·sel ong·enga ine matnanganio sing·anina, Tynsong aganchakangaha, ia jedakgipa kattarangko aganangna ian senggnangdugaenga, ine aganaha.
Indakeba janapangaha, GHADC-o tangka paisani gita neng·nikanio kam ka·china a·dok sorkari aro Governor-ko sinjetenga.
District council-o Governor-ni Rule-ko ta·rake ra·gate on·china a·dok sorkariko Congress dol sing·doenga, Garo Hills Autonomous District Council (GHADC)-o neng·nikanirang baksa mongsonggiparangko bakrimatanio aro kam ka·anio a·dok sorkari chu·sokja ong·ode ramaona aro dharna-ko dakna TMC ka·mikenataniko on·angaha.
