TURA: Aadhar website-o dingtang dingtang kamrangna Aadhar-ko nangtelgipa dake Aadhar form-rango ong·atahani gimin South Garo Hills a·jani social activist Greneth M Sangma, suk ong·gijaniko parakatenba, Supreme Court-ni rai on·anio pangchake, Aadhar-ko nangtelgipa ong·atjachina, Unique Identification Authority of India (UIDAI)-ni ning·o donggipa Aadhar Website/Portal-ni Administrator-ko didiataha.
Sangma-ni parakatani gitade, dingtang dingtang kamrangna Aadhar-ko nangtelgipa ong·atna man·jawa ine Supreme Court raiko on·manahachim indiba Aadhar website-o dingtang dingtang kamrangna Aadhar-ko jakkalna nangtelgipa dake Aadhar form-rango seskaahachim.
“Uni gimin Supreme Court-ni ge·etaniko manie Aadhar-o nangegipa dingtang dingtang kamrangna nangtelgipa ong·atjachina anga mol·molenga,” ine Sangma, Aadhar Website/Portal-ni Administrator-na sedoatgipa chittio parakataha.
Aadhar-ko nangtelgipa ong·atna man·ja ine talatanirangko on·angengon, dingtang dingtang kamrangna Aadhar-ko nangtelgipa dake ong·atna man·ja ine Supreme Court-an raiko on·manahani gimin dingtang dingtang kamrangna Aadhar-ko nangtelgipa ong·ataniara kacharini ge·etaniko manija gita ong·gen ine Sangma parakataha.
“Aadhar-ko nangtelgipa ong·atgija basena cholko on·aniara dingtang dingtang a·selrangchi Aadhar-ko jakkalanio ba ra·anio neng·nikanirangko chagrongna nangenggipa manderangnaba cholko on·ani ong·gen aro manderang, sorkarini on·enggipa dingtang dingtang namgnirangko ra·anioba, an·tangtangni gipin Identity card-rangko jakkalna chol ong·gen,” ine Sangma, Aadhar Website/Portal-ni Administrator-na sedoatgipa chittio parakataha.