SHILLONG: Rang·sitanio saani, ok aro bibikrango saani, dengue ba Zika sabisirang gita dakgipa saanirangchi mandeko nom·atgipa Guillain-Barre Syndrome (GBS)-ni skanggipa chinko man·on, hospital-rangona re·ange sanna bananiko ra·china gita Meghalaya a·dokni Integrated Disease Surveillance Program (IDSP)-ba a·dokni manderangna mikrakataniko on·aha.
Pune songjinmao ia GBS giproroani ja·man a·dok aro ma·mong sorkarini official-rangba jajrengchakaniko man·ani ja·man, Meghalaya a·dokoba ia saanina mikrakataniko on·angaha.
GBS-ni chinko nikchengon, sabisirang giprorojana gita hospital-rangona re·ange admit ka·china aro sanna bananiko ra·china IDSP, ku·pattianiko on·ataha.
IDSP-oni u·iatani gitade, GBS-ni skanggipa chinrangara, bilgriani, ja·arango chimitani, rama re·o ba jang·kerangko gadoanio neng·nikani aro uandakgipa chinrangan ong·a indiba saanirang bilongbatahaode, rang·sitna man·gijani, minokna ba ku·aganna man·gijani chinrangan ong·skaaha.
Iandakgipa chinrangko nikna man·ahaon, mandena bilongbate simsak nirokanirangko on·na nanga ine IDSP-oni u·iataha.
Iandakgipa chinrangko nikon an·tangtang sam ringe dongaigija hospital-rangona re·angchina, rongtal an·talaniko rakkichina, gittang cha·anirangko ba mitchigimin cha·anirangko cha·jachina, dengue ba Zika man·gipa biaprango ganggu chikaoni chel·e dongchina aro an·tangtangko mangrake rakkina gita namgipa cha·anirangko cha·chinaba IDSP ku·pattianiko on·ataha.