WILLIAMNAGAR: Mongolbar salo, Central Silk Board, East Garo Hills a·jani District Sericulture Office baksa nangrime ‘Mera Resham Mera Abhiman’ (MRMA)-ni bidingo awareness program-ko ong·atangaha.
East Garo Hills a·jao Muga aro Eri kilding tarianiko bariatna gita ia program-ko ong·ataha.
Ia program-ko Boko Kaliabari-o donggipa CSB-SSPC-ni Scientist-B Dharavath Saicharan dilangaha aro East Garo Hills a·jao sericulture-na namgipa cholrang dongani gimin agan-talatanirangko on·angaha.
Ia program-ko ong·atanio, East Garo Hills a·jani District Sericulture Officer aro Nodal Officer SG Momin, jinmana aganprakengon, Muga aro Eri kildingrangko tarianichi man·enggipa janggi tangani cholrangni gimin aganangenba, ian songni me·chikrangna aro chadamberangna janggi tangani cholrangko on·na man·a ine parakataha. MRMA campaign-ni ning·o on·enggipa training-rango donge, namgnirangko ra·china gitaba ua jolo Muga aro Eri kilding tarigiparangko didiangaha.
Ia program-ko ong·atanio, Samanda Block-ni BDO Tochrina R Sangma, mongsonggipa sokgipa ong·e jinmana aganprakengon, Muga aro Eri kildingrangko tarianio East Garo Hills a·jako mongsonggipa biap ong·atna gita songni nokni manderangko bakrime kam ka·china didiangaha.
Ia tom·anio, Williamnagar-ni Sericulture Demonstrator Utom A Sangma mittelpilani kattarangko aganangengon, iandakgipa program-rangko ong·atna dakchakanirangko on·engani gimin CSB aro Sericulture Department-ko mittelpilangaha.
