TURA: Tura Medical College-ko Public-Private Partnership (PPP) mode-o chalaina gita a·dok sorkarini manchienganiko jegale, Garo Hills-ni dingtang dingtang dolrang, chong·motan Tura Senior Citizens Forum (TSCF), Mothers’ Union, New Tura Development Forum (NTDF), GSU, FKJGP, ADE, AYWO, FAF, GSMC, ACHIK, PGSU, AIGU aro GGU dolrang, jinma jingjengatanirangko dakna ka·mikkenataniko on·angaha.
“Tura Medical College & Hospital-ko PPP mode-o chalaina tik ka·aniko chinga raken jegalenga maina ian Garo Hills-o songdongenggipa manderangna an·seng baljokaniko on·anio aro medical-ko poraina sienggipa chadamberangna on·enggipa cholrangko ra·sekani ong·enga,” ine Garo Hills-ni NGO-rang parakataha.
“Shillong Medical College-kode chu·gimikan sorkarichi chalaina tik ka·enba maini gimin Tura Medical College-kode PPP mode-o chalaiskana miksongenga? Tura-ni manderangde sorkarini dangdike on·ako man·na krajama?” ineba Garo Hills-ni NGO-rang sing·doataha.
Tura Medical College-ko PPP mode-o chalaina miksongenganiko batanggimin somoirangonin Garo Hills-ni dingtang dingtang dolrang jegaltokengoba iani bidingo a·dok sorkari, dingtangatna miksongani ba ja·ku de·anirang dongkujaengani giminba NGO-rang suk ong·gijaniko parakataha.
Assam a·dokni sorkari medical college-rangode 85% seat-rangko joltangni chatro chatrirangnan chamgenchimoba Tura Medical College-ode 50% seat-rangkosan joltangni chatro chatrirangna chamskaenga ine a·dok sorkariko matnangatengon, “Tura Medical College-ko kulianichi an·tangtangni dedrangba medical-ko poraianio nambata cholrangko man·pagen aro nambata sanna bananirangko man·gen ine ka·dongesa joltangni manderang, a·arangko jaksrambee on·giltokaha. Uamang, gam-jinrangna mikpakma nie ia a·arangko on·gila ong·ja indiba sorkario ka·dongesa on·giltokaha,” ine NGO-rang parakataha.
Manderangni jegalanirangko manigija Tura Medical College-ko PPP mode-o chalaina ja·ku de·angkua ong·ode mikkangchi jinma jingjengatanirangko dakna draatako man·gen ine mikrakataniko on·angengon, ia medical college-ko PPP mode-o chalaina tik ka·aniko ra·pilchina aro ia medical college-ko chu·gimik sorkarini jako ra·e chalaienba, National Medical Commission-ni dongimin niam gita joltangni chatro chatrirangna 85 percent seat-rangko kangna nanga ine Garo Hills-ni NGO-rang dabiangaha.