TURA: Garo Hills Autonomous District Council (GHADC)-ni B-Mahal ning·o donggipa dingtang dingtang songrango, Assam a·dokni manderang napdrabae, rubber aro gue baganrangko dakengan baksana ia jolrango ro·ong aro bol ratani karkanarangko chalaienga ine Pedaldoba-ni dingtang dingtang dolrang, chong·motan GSMC, AHAM, FAF, ASPF, FKJGP aro ACHIK dolrang matnangatenba, mikkangchi ia biaprango Assam-oni re·bae bagan bari dake cha·giparangko aro ma·manti karkana dake cha·giparangko champengna rakgipa ja·kurangko de·anggen ine mikrakataniko on·angaha.
Pedaldoba-o donggipa NGO-rangni parakatani gitade, adita salrangna skang, Garo Hills-ni dingtang dingtang dolrang, West Garo Hills-ni DC, ADC, aro gipin dilgiparang baksa Tura Circuit House-o tom·aniko ong·atenba, B-Mahal jolona bamboo industry ba wa·a karkanako ra·baani bidingo chanchirimangaha aro ia tom·anio, All Rabha Students Union of Meghalaya (ARSUM)-ni dilgiparangba dongpae bak ra·angahachim.
Ia wa·a karkanako ia jolona ra·baani bidingo talate on·angengon, ian kror 700-na batgipa project ong·a aro ia project-na biaprangko chanchiangon, GHADC-ni ning·o donggipa Medhipara, Borogobal aro Kolitapara songni jatchio mande nok dongkugijagipa biaprangan chu·onggen ine nikenba pilakan ia project-ko namnike ra·chaktokahachim ine Pedaldoba-ni NGO-rang parakataha.
“Ia karkanako kulianichi, ian songo noko lekka pora dongeba kamgri ong·e dongenggipa chadamberangna namgipa chol ong·gnok aro iano sak 5000-na baten songni nokni manderang kamrangko ka·e cha·na man·gnok ine nikaha. Indake jinma namnike tik ka·ani ja·man, ARSUM-ni dilgiparang, ia project-ko jegale social media-rango seanirangko chinga nikna man·aha aro ia project-ko jegalenggipa manderangara bang·batan Assam-onisa ong·a ine chinga ma·sina man·aha. Maini gimin ia project-ko Assam-ni manderang jegalenga ine chinga am·sandie nion, ia jolrangona Assam-ni manderang napdrabae, rubber bagan, gue bagan aro uandakgipa bagan barirangko dake cha·an baksana maming niam gri ro·ong aro bol ratani karkanarangko chalaienga ine chinga ma·sina man·aha,” ine Pedaldoba-ni nangrimgimin NGO-rang parakatenba, iandake Assam-oni re·bae Garo Hills-o bagan bari dake cha·aniko aro karkana chalaianiko mikkangchi champengna rakgipa ja·kurangko de·anggen ine parakataha.