Kam ka·giparangni kalimanio pilak MDC-rangkon bakrimchina Mukul didia
TURA: Garo Hills Autonomous District Council (GHADC)-o kam ka·giparang, ja 43-ni dormaharangko man·kujaengani gimin kamtangtangko ka·gija jingjengatanirangko dakengon, Bristibar salo, Trinamool Congress (TMC) aro Opposition dolni dilgipa Mukul Sangma-ba, jingjengatenggipa manderangko gronge, an·tangni chakpaaniko on·eaha.
GHADC-o kam ka·giparangko grongeanio, Mukul Sangma baksana Ampati-ni TMC MLA Miani D Shira, Tura-ni BJP MDC Bernard N Marak, Opposition TMC-ni MDC-rang aro TMC-ni gipin dilgiparangba dongpaaha.
GHADC-o kam ka·giparangni dabienganiko knachakjaengani gimin aro GHADC-na dingtang dingtang dabianirangko chu·sokate on·jaengani gimin Budbar sal dipet, Opposition MDC-rangba asonge jingjengatna a·bachengatahachim ine nikna man·a.
GHADC-o kam ka·giparangko grongeani somoio TMC-ni dilgipa Mukul Sangma, jinmana aganprakengon, indita jarangna kam ka·giparangna dormaharangko on·na man·jaengani gimin aro daitoko jako ra·jaengani gimin GHADC-ni Executive Committee aro a·dok sorkariko matnangataha.
GHADC-o kam ka·enggiparangna an·tangni kalimchakpaaniko parakatengon, kam ka·giparangni dabianiko chu·sokatna ua an·tangba bakrime kamko ka·gen aro ia kamko chu·sokatesa dongen ine Sangma, ku·rachakaniko on·angaha.
GHADC-o kam ka·giparangni dormahako on·na gita japrako gong kror 6.21-ko nanggenchimoba bilsio kror 75-mangsan ong·aia ine janapatengon, ua an·tangan GHADC-na ma·mong sorkarioniko gong kror 100.71 tangkarangko man·bae on·ahachim aro ia tangkarangko name jakkala ong·ode da·alo iana bate kror 200 ba kror 300-kon man·bagnokchim ine Sangma parakataha.
Constitutional Provision ba niam bidikni on·gimin bilrangko jakkale GHADC-ni man·gnirangko on·china gitaba ua, a·dok sorkariko didiataha.
District Council-ode party dongna man·ja ine ua GHADC-ni MDC sakantikon, kam ka·enggiparangni kalimanio aro dabianirango bakrimaniko on·china gitaba Sangma didiangaha.
Ia tom·anio, Tura-ni BJP MDC Bernard Marak-ba, jinmana aganprakengon, jekai EC-ko chalaienggiparang, kam ka·giparangna dormaharangko on·na gisik nangjaenga apsan daken Opposition MDC-rangnaba man·gnirangko on·na gisik nangjaenga ine parakataha.
Ma·mong sorkarini GHADC-na chamatgipa gong kror 100.71 tangkani Utilisation Certificate (UC)-ko on·na man·jaengani a·selan GHADC-na ma·mong sorkarioniko tangka paisarangko man·bana neng·ani ong·engaha ineba Marak parakataha.