SHILLONG: Adita salrangna skang, gimagipa Metric ton 4000 koelarangni bidingo, Ri Bhoi aro West Khasi Hills a·jani deputy commissioner-rang, an·tangtangni sandie man·gipa report-rangko on·ani ja·man a·dok sorkari, affidavit-ko tarienba, Meghalaya High Court-na on·anggen ine Bristibar salo, a·dokni Deputy Chief Minister Prestone Tynsong parakataha.
A·doko gital koela bikotani aro salruraani bidingo matnanganirangko jegalatengon, niam gri koela bikotanirang donggenchimode a·songo dongimin niamrangchi nanga gita ja·kurangko de·angaigen ine Deputy Chief Minister, ku·rachakaniko on·angaha.
Meghalaya a·doko niam gri koela bikotani aro salruraanirangko champengna gita 2014 bilsionin a·dok sorkari, Police aro district administration-na ge·etanirangko on·manaha ineba Tynsong janapataha.
Coal depot damgnio, niam gri bikotgipa MT 4000-mangni gita koelarang gimaani ja·man, iani bidingo rakgipa ja·kurangko de·china aro ia koela gimaani bidingo official-rangko rim·china gita Meghalaya High Court, adita salrangna skangsan a·dok sorkarina ge·etaniko on·angahachim.
Ri Bhoi a·jani Diengngan songo donggipa depot-o MT 1,839.03 koelarangko Meghalaya Basin Development Authority (MBDA) see rakkiahachim indiba ia biapona re·ange nipiltaianiko dakon, ia biapo MT 2.5 koelarangkosan man·aiahachim.
Apsan daken, West Khasi Hills a·jani Rajaju songoba MT 2,121.62 koelarangko MBDA segatahachim indiba ja·mano MT 8-mangni gita koelakosan man·aiaha.
Gimaenggipa metric ton 4000 koelarangni bidingo Ri Bhoi aro West Khasi Hills a·jani deputy commissioner-rang, sal 30-ni gisepon report-ko on·na gita Justice (Retired) BP Katakey committee-na ku·rachakaniko on·ahachim.
“Iani bidingo inquiry-ko dakchina anga ge·etaniko on·aha aro uamang jasani gisepon report-ko on·na ku·rachakaha,” ine adita salrangna skangsan, Justice Katakey kobor ra·timgiparangna aganaha.