SHILLONG: Tura Medical College-ko a·dok sorkarini Public-Private Partnership (PPP) mode-o chalaina miksonganiko aro ia medical college-ko All India Institute of Medical Sciences (AIIMS) dake kuliskachina Tura-ni Congress MP Saleng A Sangma-ni didianiko a·dokni Opposition Trinamool Congress (TMC) jegalatenba, ia minggnian a·dokni namgnina, mongsongbate Garo Hills-ni namgnina Medical College kulie on·aniko nisie galani gita ong·enga ine parakataha.
“Tura Medical College-na jera ra·grikaniara an·chingni mikkangchina namgnini giminsa jera ra·grikani ong·enga aro anga saksa chadambe aro a·doko songdongenggipa mande ong·e, a·dokni namgnina ku·rangko on·na nangao ga·aka,” ine TMC-ni chadambe dolko dilenggipa Richard Marak parakataha.
Tura Medical College-ko AIIMS dakatskachina Tura MP-ni didianiko jegalatengon, uni miksonganiara namen nambegipa ong·genchimoba, ma·mong sorkarini tangka paisachi kulienggipa medical college-ara Meghalaya a·dokna aro mongsongbate Garo Hills-ni manderangna namgnisa ong·engani gimin ian kenchakna nanganiba ong·enga ine Marak parakataha.
“Tura Medical College-ko AIIMS dake kuliskagenchimode ian an·chingni jakgitelani aro an·chingni reservation policy-rangko pe·ani gita ong·gen maina ma·mongchi chalaienggipa institute-rangde a·dokni nanganirangko ma·sichakjawa aro ma·mongni niamrang gitasa chalaigen. Ian an·chingni sanna banani cholrangko nambatatani aro chadamberangna medical-ko skie ra·na namgipa chol ong·engani gimin iandakgipa cholko ma·mongni jako on·aniara kraani ong·jawa,” ine TMC-ni dilgipa parakataha.
Tura Medical College-ko PPP mode-ko chalaina tik ka·engani gimin Conrad Sangma-chi dilenggipa sorkariko jegalatskaengon, ian daitotangko jako ra·na sikgijaniko mesokanisa ong·enga ine Marak matnangataha.
Tura medical college-ko PPP mode-ko chalaigenchimode, sanna bananirangko on·anio aro chadamberangni medical-ko poraianioba korosrang namen tang·dogen ineba TMC-ni dilgipa mikrakataniko on·angaha.
“Uni gimin ia medical college-ko PPP mode-o chalaina miksonganiko ra·pilchina chinga a·dok sorkariko didienga aro ia medical college-ni biapo AIIMS-ko kuliskachina didianikoba jegalenga,” ine Marak parakataha.