TURA: North Garo Hills a·jani Dajong Warima Government Lower Primary skulo classroom aro skigiparang chu·ongjaengani a·sel skulo poraienggipa chatro chatrirang aro kam ka·giparangba neng·nikanirangko chagrongna nangtokenga ine A·chik Holistic Awakening Movement (AHAM) Bajengdoba regional unit parakatenba, ia skulko nirokatchina gita a·dokni Chief Minister Conrad K Sangma-na sedoataha.
Chief Minister-na sedoatgipa chittiko AHAM Bajengdoba regional unit-ni dilgiparang, North Garo Hills a·jani Deputy Commissioner-ni jako on·ataha.
Chief Minister-na sedoatgipa chittio AHAM Bajengdoba regional unit-ni parakatani gitade, ia Dajong Warima LP skulo sak 75 bi·sarang poraitokpaenga indiba ia skulo classroom aro skigiparang chu·ongjaengani a·sel neng·nikanirangko chagrongna nangtokenga.
“Ia skulo classroom-rang chu·ongjaengani a·selan pilak section-rangkon classroom ge·sano asongate class ra·na nangao ga·akenga aro iani a·selan poraienggipa bi·sarang aro skigiparangba neng·nikanirangko chagrongna nangenga. Unbaksana ia skulni bi·sarangna Mid-Day Meal (MDM)-ni cha·anirangko song·e on·na gita babilsiba dongja aro chi tengkirangba dongjae, neng·nikanirangko man·na nangenga,” ine AHAM Bajengdoba regional unit-ni dilgiparang parakatenba, ia skulna classroom, babilsi aro chi tengkirangko rike on·an baksana skigiparangba rakkidapchina a·dokni Chief Minister-ko didiataha.
