NEW DELHI: Indian Constitution-ni Article 3-ni ning·o Garoland a·dokko bikote on·china didie, Bristibar salo Garoland State Movement Committee (GSMC)-ni dilgiparang, a·songni President Droupadi Murmu-naba sedoataha.
A·songni President-na sedoatgipa chittio GSMC-ni parakatani gitade, an·tangtangni a·songon aro gipin a·songrango songdongenggipa A·chikrangba neng·nikanirangko chagrongna nangengani gimin A·chikrangna on·gimin bilko chel·chakna gita dingtang a·dokko nangenga.
Garoland a·dokna dabianiara gital dabiani ong·ja ine janapatengon, Garoland a·dokna dabiani, 1895 bilsimangon a·bachengaha aro ua somoirango A·chikrangni skanggipa political leader Pa Sonaram R Sangma, British-rangni sason ka·engmiting somoio A·chikrangna dingtang a·dokko dabidilaha ine GSMC-ni dilgiparang parakataha.
Pa Sonaram Sangma-ni ja·man Mody K Marak aro Emonsing M Marak gita dakgipa A·chik dilgiparangba, A·chikrangni songdongchakenggipa Assam aro Bangladesh a·songni Mymensing jolrangkoba Indian Union-o napatchina dabiahachim ineba GSMC-ni dilgiparang parakataha.
Adita salrangna skangsan GSMC-ni dilgiparang, Union Tribal Affairs Minister Jual Oram-koba gronge, A·chikrangna dingtang Garoland a·dokko bikote on·ani bidingo agangrikangaha aro ua uamangni dabianirangko niatna ku·rachakaniko on·ataha ine u·iataha.
Iana agreba, GHADC-o kam ka·enggiparang, ja 43-ni dormaharangko man·kujae neng·nikanirangko chagrongna nangengani gimin, iandakgipa neng·nikanirangko namatna dakchakanirangko on·china GSMC, ma·mong sorkariko didiataha.
