SHILLONG: Meghalaya a·doko Territorial Army-ko bikotna ra·chakaha ine parakatani ja·man badia ministry-oni iako ra·chakna bil donga, iani bidingo jajaanirang ong·katengani gimin Meghalaya Police, Mizoram a·dokni police-rango sing·sandiatkuenga ine Sukrobar salo, a·dokni Director General of Police (DGP) Idashisha Nongrang parakataha.
DGP-ni parakatani gitade, a·doko Territorial Army ba People’s Army-ko bikotna ra·chakaha ine parakatgipani bidingo police-rang, adita jajaanirang dongkuenga.
“Mizoram a·doko Territorial Army-ko bikotna badia ministry bilko on·aha chinga iani bidingo sing·sandiatkuenga maina kobor on·ani gitade, Mizoram a·dokna Union Home Minister-sa bilko on·aha. Indake ong·genchimoba Territorial Army-kode Indian Territorial Army Act-ni ning·osa chalaia aro ian Defence Ministry-ni ning·osa ong·ani gimin adita jajaanirang dongkuenga. Iani bidingo anga Mizoram a·dokni DGP-o tale sing·sandiatkuenga. Badia ministry-oni Mizoram a·dokna ra·chakaha, chinga iako ma·sina nangchengenga,” ine Nongrang aganaha.
Meghalaya a·doko Territorial Army-ko bikotna gita a·dok sorkari, ma·mong sorkarini ra·chakaniko man·soaha ine re·anggipa Budbar salosan a·dokni Cabinet Minister aro MDA-na ku·wattimgipa Paul Lyngdoh parakatahachim ine nikna man·a. Assam aro Mizoram a·dok damgnion Territorial Army-rangko songaha ineba ua aganahachim.
Meghalaya a·dokona niam gri napsrukanirangko champengna gita Territorial Army ba manderangni sipai dolko bikotchina Khasi Students Union (KSU)-ni dabiangani ja·man iako Lyngdoh parakatahachim.
Ma·mong sorkarini u·iatgipani bidingo a·dokni Cabinet-na re·baenggipa August 26 tariko ra·angnaba gnang ine ka·dongsona man·enga.
Gipin biaprangoni napsrukbaenggiparangko champengna BSF aro a·dok sorkarina agre, songo donggipa manderangni dakchakanirangkoba nangenga aro ia Territorial Army-an iandake napsrukanirangko champenganio kamrangko ka·na man·gen ineba Lyngdoh aganahachim.