TURA: West Garo Hills a·jani Demdema C&RD Block ning·o Cluster Resource Person (CRP)-ni kamna ra·gipa sakgni manderangko ra·galpilchina dabie Rajabala-ni dingtang dingtang Civil Society Organisation (CSO)-rang, chong·motan GSU, FKJGP, GSMC, ASPF, Niksamso, aro APA dolrang, West Garo Hills-ni District Mission Coordinator-na sedoataha.
Demdema Block-o ia sakgni manderangko CSO-ni kamna ra·aniko jegale, re·anggipa Bristibar salo ia dolrang, Rajabala jolrango re·jomanikoba ong·atangaha.
Ia CSO-rangni parakatani gitade, ia CRP-ni kamrangara Scheduled Tribe (ST) candidate-rangna miksonge dongipa kamrangsa ong·achim indiba kamko Hazira Yasmin Mondal aro Rani Sarkar minggipa gipin jat candidate-rangnasa on·skaaha.
“Ia kamrangko state reservation policy gita ong·gija gipin jatni candidate-rangnasa on·aha aro ian Garorangna tikatgimin bak rengsiko ra·seka gita ong·enga. Uni gimin a·dokni reservation policy-o pangchakesa kamko on·china chinga dabienga aro ia mande sakgniko kamoniko ra·galpilchinaba dabienga,” ine Rajabala-ni CSO-rang, West Garo Hills a·jani District Mission Coordinator-na sedoatgipa chittio parakataha.