SHILLONG: Meghalaya aro Bangladesh a·songni simarango ‘fencing’ kakugijagipa biaprang gita Bangladesh a·songni manderang, Meghalaya-ona napsrukbaenga ine official-rang parakataha.
Official-rangni u·iatani gitade, adita salrangna skang, South West Khasi Hills a·jani song damsao chadambe saksako rim·gittange dakait dakgipa manderangba sima kakugijagipa biap gitasa Bangladesh-oni napsrukbaahachim.
Meghalaya aro Bangladesh a·songni gisepo km 443 simarang donga aro ianoni da·o dipet 20 percent-mangni gita simarangkode, dingtang dingtang a·selrangchi ‘fencing’ kana man·kujaengachim.
Re·anggipa August-ni 8 tariko Bangladesh a·songoni napsrukbae, songni manderangko dakait dakani ja·man, ia songrangona a·dok sorkari, membor sakgittam donggipa committee-ko watataha. Ia Border Area Development Committee-ni membor-rangara, committee-ni vice chairman Kitborlang Nongrem, gitcham MLA Himalaya M Shangpliang aro Mendipathar MLA Marthon J Sangma ong·a.
Ia committee-ni membor-rang, Khonjoy, Rongdanggai aro Maheskola songrangona re·ange, songni manderango sing·sandion, Bangladesh a·songni manderang, nosto ong·gimin fencing-rang gita aro fencing kakugijagipa biaprang gita napsrukbana man·enga ine songni manderang parake on·aha.
“Ia simarango BSF outpost-rang donggenchimoba biaprang ga·nangjani gimin aro mitam biaprango simarangko kapengkujani gimin, Bangladesh a·songni manderang napsrukbana cholrangko ra·enga,” ine Mendipathar MLA Marthon Sangma aganaha.
Iandake simarang gita Bangladesh a·songni manderang napsrukbana man·engani a·sel songni manderangna, mongsongbate me·chik aro bi·sarangna kenchakna nangani ong·engani gimin songni manderang, ia simarango chel·chakanirangko on·china nangnikenga ine Shangpliang parakatskaaha.
Ia committee-ni membor-rang, bakan a·dokni Chief Minister Conrad K Sangma-na report-ko on·anggen ineba official-rang parakataha.