SHILLONG: Meghalaya a·doko bobil dake chakatgipa dolrangko bon·atna man·aha ine MDA sorkari a·kangengon, a·doko skia man·gipa adita chadamberang, bobil dolrangko napangaha aro skie ra·aniko matchotahani gimin a·doko bobil dake chakatgipa dolrang ong·katbataenga ine Opposition dolni dilgipa Mukul Sangma, mikrakataniko on·angaha.
A·doko lekka pora donggipa chadamberangna janggi tangani cholrangko on·na man·jae, chadamberangko ong·gija ramarango dilsretatenga ine a·dok sorkariko matnangatengon, a·doko bobil dake chakatgipa dolrangko ong·katattaina sienga ine Sangma, mikrakataniko on·angaha.
“Uamang (sorkari) ma·sija ine pangna dakronga gita jegale dongaigenchimode uan sorkarini chu·sokgijanian ong·enga indiba kenna nanganide ong·engaha. Koborrangko man·soani gitade, skia man·gipa bang·a chadamberangan, sorkarini kosako ding·chaoe, a·songni kosako chakatna a·bachengtaiengaha,” ine Sangma aganaha.
A·doko iandake kenchakna nanganirang ong·engoba ia sorkari, mikrake kamrangko ka·sona gisik nangjaenga ineba a·dokni gitcham Chief Minister aganaha.
Mukul Sangma-ni Chief Minister ong·engmiting somoirangon ANVC dolrangko man·chape bang·a bobil dolrangkon bame on·aniona rimbana man·ahachim ine nikna man·a.
A·doko bobil dake chakatgipa dolrang ong·kattaiani cholrang dongama ine sing·anina aganchakaniko on·angengon, “A·dokni bang·a chadamberangan dingtang dingtang dolrango napangaha aro training-rangkoba matchotaha. Ian jajrengna nangani ong·chongmotenga indiba da·alonan iarangko warachaksona gita sorkarioni maming aganchakanirang dongkujaenga,” ine Sangma aganaha.
Chadamberangni kamgri ong·e donganiko namatna ja·kurangko de·ja ong·ode, chadamberangko ding·chaoatanionan sokaigen aro ja·mano uamang a·songni kosakon chakatangaigen ineba Sangma aganaha.
“Iako da·onin champengsona nangenga aro chadamberangna cholrangko on·na man·genchimosa iako champengna man·gen,” ine ua aganaha.
Ma·a paarangni dedrangna skanirangko janapatengon, Meghalaya a·dokni songadam nokadamrangoba ia sal somoirango ma·a paarang, an·tangtangni dedrangna namgipa lekka porako on·na gita je chol man·paachi dakchakanirangko on·enga ine Sangma parakataha.
“Da·alo an·ching songadam nokadamrangoba skia man·gipa chadamberangko bang·en nikna man·engaha. Ia chadamberang a·gilsakni seng·aniko ra·anio dingtang dingtang neng·nikanirangko chagrongna nanggenchimoba an·tangtangni poraianirangko matchotna jotton ka·enga maina uamangba dal·gipa manderang ong·pana jumangrang nikpaa,” ine Sangma aganenba, ia chadamberangna kamrangko on·na man·jagenchimode uamangni gisikrango suk ong·jae, ong·gija ramarango dilsretaniko man·ronga ine talataniko on·angaha.