SHILLONG: Meghalaya a·doko baditaba bilsirangna tom·tomaniko man·piltaiani ja·man da·o bobil dake chakatgipa dolrangko bikottaina jotton ka·enga ine kobor on·aniko Sukrobar salo, Meghalaya a·dokni Police-rangba ku·rachakaha.
“Oe, gital bobil dolko bikottaina gita chadamberangko rimnapenga ine chinga koborrangkode man·soenga indiba badia dolni manderang, badia chadamberangko rimnapna jotton ka·enga, ukosa chinga ma·sikuja,” ine a·dokni Director General of Police (DGP) Idashisha Nongrang parakataha.
Da·o dipet a·doko bobil dolrangko bikottaina jotton ka·enga ine kobor man·enggipani bidingo tale ma·sikujaengoba chinga mikrake kamrangko ka·enga ineba ua aganaha.
DGP-ni parakatani gitade, a·doko bobil dolrangko bikottaina gita chadamberangko rimnapenga ine Opposition dolni dilgipa Mukul Sangma-sa, State Security Commission-ni tom·anirangko parakchengaha.
“Ua Opposition dolni dilgipa ong·e, iandakgipa kamrangni gimin bang·en ma·sigipa ong·a aro chinga iani bidingo mikrake kamko ka·enga. Skia man·gipa aro skia man·gijagipa chadamberangko bobil dolrangko rimnapna jotton ka·enga ineba Opposition dolni dilgipa aganaha aro iani bidingo ua batanggimin chang State Security Commission-ni tom·anioba aganaha. Iarangko chinga knatime ra·enba, ning·tue am·sandienga,” ine Nongrang aganaha.
Dingtang dingtang degree donge skia man·gipa chadamberang, bobil dolrango napangaha aro da·o uamang training-rangkoba matchotaha ine Bristibar salosan, Opposition dolni dilgipa Mukul Sangma, mikraksamsoatanikoba on·angahachim.
“Uamang (sorkari) ma·sija ine pangna dakronga gita jegale dongaigenchimode uan sorkarini chu·sokgijanian ong·enga indiba kenna nanganide ong·engaha. Koborrangko man·soani gitade, skia man·gipa bang·a chadamberangan, sorkarini kosako ding·chaoe, a·songni kosako chakatna a·bachengtaiengaha,” ine Sangma aganaha.
A·doko lekka pora donggipa chadamberangna janggi tangani cholrangko on·na man·jae, chadamberangko ong·gija ramarango dilsretatenga ine a·dok sorkariko matnangatengon, a·doko bobil dake chakatgipa dolrangko ong·katattaina sienga ine Sangma, mikrakataniko on·angaha.