TURA: Sukrobar salo, Tura-ni Rongkon-o donggipa College of Teacher Education (CTE)-o Drugs ba pekatgipa samrangni mandena namgijaniko ra·bana man·ani bidingo manderangna, mongsongbate chatro chatrirangna mikrakataniko on·na gita dingtangmancha awareness program-ko college-ni auditorium-o ong·atangaha.
Ia awareness program-ko ong·atanio, Tura Civil Hospital-ni ning·o donggipa Addiction Treatment Facility-oni Amesa Chesrame S Sangma, pekatgipa samrangko jakkalanichi maikai mandena namgijaniko ra·bana man·a, uarangni bidingo agan-talatanirangko on·angaha.
Ia sal somoirango manderang, pan masala, chu aro uandakgipa bosturangko jakkalanirang batroroengani giminba Sangma, mikrakatanirangko on·angaha.
Pekatgipa bosturangko jakkalanichi mai dakgipa sabisi sakanchirangko man·na ama, uarangni giminba Sangma agan-talatanirangko on·angaha.
Pekatgipa bosturangko jakkalaniara jakkalenggipa mandenasan ong·aigija, uni nokdang aro songsalnaba nangchakeanirangko ra·baa ineba ua aganaha.
Ia program-ko ong·atanio, Tura CTE-ni Principal Dr Meena A Sangma-ba jinmana aganprakengon, pekatgipa bosturangko cha·tote nijachina aro pangnan an·tangtangko an·seng baljoke rakkichina chatro chatrirangko didiangaha.
Ia awareness program-ko ong·atanio District Institute of Education & Training (DIET) aro samba jolo donggipa dingtang dingtang skulni chatro chatrirangba bak ra·angtokaha.
