TURA: Garo Hills-ni district gimiko Soil & Water Conservation Department-ni gita chu·sokatenggipa dingtang dingtang scheme-rango kam ka·ani gadangrango report-ko Niksamso Garo Community Organization (NGCO), dabiangaha, jeon chu·sokatenggipa bang·bata scheme-rang aro project-rango kam ka·a namgijako nikaha.
Manderangoni matnanganirangko man·soani ja·man PMKSY Scheme-ni ning·o Garo Hills district gimiko chu·sokatenggipa project-rangni bidingo RTI Act-ni ning·o u·iataniko on·china Organization dabiangaha.
RTI ka·anganio rim·a man·ani gitade bang·bata kamrangan matchotkujaenga aro DRP-o skangni mesokani gita tangka koros ka·a ong·jaenga ine Organization u·iataha. District ge·antini Watershed Committee-ni President aro Secretary-ko Organization-ni mol·molangani somoio, uamang project ge·antini chu·gimik tangka paisarangko mesoke on·a man·jaha, indake uamang agnaangaha, department-ni manderang an·tangtang re·bagen, biapko nia aro kamko uamang an·tangtangan ka·aia, ine aganangaha.
“Jensalo chinga RTI report-rang baksa department office-oniko sing·sandianiko dakaha, chingna official indake aganangaha, PMKSY-ni ning·o project-ko ra·baanio maming agangrika dongja kamrangko department tangtangni gita ka·angaia,” ine NGCO u·iataniko on·dapangaha.
Scheme-ni ning·o department-ni gita dingtang dingtang kamrangko ka·aha, jekai na·tok jilchakani pokri, C.C Check na·gil, matchu nokrang, Afforestation Tailoring, bija jilchakgipa box-rang, bol ge·ani, wak jilani, kitchen garden dakani, do·o jilani, me·gumu ge·ani, dokan dakani, bara dokani, pokri cho·ani, carpentry, bakroe a·a cho·angani, Gabion pakma ka·ani, spring chamber, power tiller, mi su·gipa rice mill, rubber so·mikani aro ugita dakgiparang donga.
District gimikon watershed unit-ni gita ia action plan-rangko project-na chamgimin tangka paisa gita tarigijaniko chinga nikaha. Mesokna gita, watershed ge·antio ge-120 tailoring unit-rangna dongna nangchim indiba ge-15 unit-rangsan dongaia, watershed -ni gita ge-10 grocery unit-rang donga chinga ge3 ba ge-4-kosan nikaia aro uarangni tangka grocery unit ge·prako tangka lak 1.50 mesoka, bang·abata songrangon uamang chu·onggijanirangko nikaha aro kam donggijaniko nikaha, ine Organization aganangaha.
“2021-oni 2025 bilsionin Garo Hills-rango PMKSY scheme-ko chu·sokatenganio kam ka·anirangna chinga kusi ong·ja. Soil & Water Conservation Department-ni gita ma·mongni scheme-rangko chu·sokatenganio uamangni parakatani gitade, pilak kamrangkon department-tangni gitan ka·enga,” ine Oranization matnangataha.
Ru·uta bilsirangna, scheme-rango namroroatna department kamrangko ka·angenga ong·ode maina Soil Department-ni ning·o Garo Hills a·jarango da·alonaba namroroani kamrangko nikjaenga?” ian sing·ani ong·enga aro Organization gipin bakrangonikoba sandiangkugen aro ma·mong sorkarini ja·ku de·enggiparangko a·bachengatna kam ka·ako nina chinga kamrangko ka·anggen aro manderangna kakket ong·chongmotako parakanggen, ine aganangaha.
Garo Hills-rango Soil & Water Conservation dept-ni kamrang tik ong·jaenga
Date:
Share post:
