SHILLONG: GHADC-o kam ka·enggiparangni dabianiko da·onaba knachakkujaenga.
Batanggimin ja 43-onin uamang dormaha dongaha aro dormahako on·china dabie jingjengatani jasa batpilengjok, uni gimin Tura-ni ramarango jingjengatan baksana Chief Minister Conrad K Sangma-ni social media platform-oba mol·molaniko dakangaha indiomangba maming aganchakani dongkuja.
Ramao jingjengatanirangara digital space ba social media-ona sokpilaha. Council-o kam ka·enggiparang aro uamangna chakpagiparang Chief Minister-ni social media page-oba adita mol·molaniko on·aha, indiba sorkari aro Chief Minister-oniko maming dakeba ka·dongataniko man·jaenga, jeni a·sel council-o kam ka·enggipa sak hajal mandeang aro uamangni nokdangni manderang gisiko ka·onangan gapaha.
A’chik Holistic Awakening Movement (AHAM)-ni president Cheran, GHADC-o kam ka·enggiparangni dormahako ia jani gispeon on·china dabiaha aro ia mamlako nirokatchina gita Meghalaya-ni Governor-ko mol·molataha. Unbaksana GHADC-o tangka paisa jakkalsretanikoba am·sandichina dabiaha.
GHADC Executive Committee-ni kam ka·enggiparangni jabrini dormahako on·sona aganako jingjengatgiaprang ra·chakna jechakaha, uamang chu·gimik dormahako on·skachina dabienga. Bang·a nokdangrangan dormaha man·gija sal somoirango sro-sname janggi tangna gita nangenga, jabrini dormaha maming dake chu·ongmanjawa ine aganaha.
Jingjengatani dokgipa anti gapengjok. Indiomangba sorkari aro Chief Minister-ni maing dakeba nirokata dongjaengani gimin jingjengatgiparang suk ong·jae sorkariko sing·doaha.
