SHILLONG: Gong kror 150-na batpile kajinarangko gamchipgija Byrnihat-o koela so·ani karkanako chalaiahani gimin Directorate General of GST Intelligence (DGGI) Guwahati zonal unit, ia karkanani nokgipako rim·aha.
Koborko on·ani gitade, Byrnihat-o donggipa GM Coke karkanani nokgipa Shiv Kumar Mittal-ko Sonibar attamo, Upper Assam-ni Tinsukia-oniko rim·aha.
Ia karkanako chalaigipa Mittal, Meghalaya a·doko niam gri chalaienggipa dingtang dingtang karkanarangoniko coke-rangko breaha aro ia coke-rangko ua tol·gipa lekkarangchisa, tol·gipa company-rangni bimingo bree, kajina gamgija dongchipahachim.
Da·o ia mandeko police-rang sing·sandiengkua aro niam gri karkana chalaianio jak donggipa manderangkoba rim·na sandirokenga ine kobor on·timgiparang parakataha.
Adita salrangna skangsan Guwahati songjinmao, tol·e tarigipa lekkarangchi bading chiwalanio jak donganina DGGI, mande sakbrikoba rim·ahachim aro ia manderangko rim·na man·ani ja·man da·o Byrnihat-o karkana chalaienggipa Mittal-koba rim·na man·aha.
DGGI-ni sandirokanio, iandake salgro salaram jolrango, niam gri coke breani aro palanirangko bang·en nikna man·aha aro iandake kajina gamna nangjana gita tol·gipa lekkarangchi bading chiwalenggipa manderangko sandina a·bachengataha.
Batanggimin jacheto Assam, Meghalaya, Nagaland, Arunachal Pradesh aro West Bengal a·dokrango iandake GST gamgijagipa sak 11 manderangko rim·na man·aha ineba kobor on·timgiparang parakataha.